पापीमान्छे, हिम्मत, पर्खिबसें, तकदिर जस्ता सफल चलचित्र निर्देशन गरेर केहि बर्षदेखि निकै नै चर्चामा आएका निर्देशक दिपक श्रेष्ठ अहिले 'हो यहि हो माया" को निर्देशन गरिरहेका छन् । उनै निर्देशकसँग यसै चलचित्रमा आधारित भएर फिल्मीखबरले गरेको यो छोटोमिठो कुराकानी -
'हो यहि हो माया' कस्तो चलचित्र हो ?
- यो एक बिशुद्व प्रेम कथामा आधारित चलचित्र हो । माया भन्दा अलग अरू केहि पनि हुन नसक्ने हुनाले यसमा वास्तविक माया के हो भन्ने कुरा यसमा देखाउन खोजेको छु ।
यो चलचित्रले कुन वर्गलाई बढि महत्व दिएको छ ?
- यो चलचित्र युवा दर्शकहरूलाई केन्द्रबिन्दुमा राखेर बनाएको छ । यस्ता दर्शकहरू जो +२ मा पढ्दै छन्, जो अलि सम्भ्रान्त परिवारमा रहेको छ र नेपाली चलचित्र हेर्न मन गर्दैन ति बर्गलाई पनि समेटेर मैले यो चलचित्र निर्देशन गरेको हुँ ।
यसमा कस्तो खालको माया देखाउन खोज्नु भएको छ ?
- १५/१६ बर्षका केटाकेटी बिच हुने मायालाई हामिले देखाउन खोजेका छौं । कलेजमा गरिने माया प्रितिका उतारचढव छ यो चलचित्रमा । त्यसै गरि धनि गरिब बिच हुने मायाप्रितिको कथा छ । यदि बिशुद्व माया, अजम्बरी माया, सागर जस्तै माया गरेको छ भने त्यो माया जोसँग पनि हुन सक्छ भन्ने कुरा यस चलचित्रमा देखाउन खोजेको छु ।
चलचित्रकी नवनायिका जियालाई कसरी हेर्नु भएको छ र उनको भुमिका कस्तो छ ?
- जियालाई मैले टिनेजको रूपमा प्रस्तुत गरेको छु । उनी एक भुटानी शरणार्थीको भुमीकामा देखिदै छिन् । एकदम दु:ख पाएकी केटीको भुमिकामा प्रस्तुत हुदैछिन् । अनि आफ्नो प्रेमिलाई अतिनै माया गर्ने केटीको रूपमा प्रस्तुत भएकी छिन् । चलचित्रमा उनको भुमीका नै सबैभन्दा महत्वपूर्ण छ । चलचित्रका दृश्यहरू अत्यन्त दर्दनाक छन् र ति दृश्यहरूमा उनले जिवन्त अभिनय गरेकी छिन् । उनको काम पनि अत्यन्त राम्रो भएको छ। आफैमा पनि उनि निकै नै राम्री छिन् । मलाई त यस्तो लाग्छ कि जब यस चलचित्रको पोस्टर बजारमा आउँछ अनि उनको फोटोमै दर्शक फिदा हुने छन् । यस चलचित्र मार्फत उनि नेपाली रजतपटमा एक सफल नायिका भएर उदाउने छिन् ।
राजको भुमीका कस्तो छ ?
- राज यस चलचित्रमा जियाको प्रेमी भएर प्रस्तुत भएका छन् । उनको अभिनयमा पनि अत्यन्त राम्रो पाएको छु मैले । उनमा पनि एउटा कलाकारमा हुने गुण मैले राजमा पाएको छु ।
राजेश र करिश्मालाई कसरि प्रस्तुत गर्नु भएको छ ?
- चलचित्रमा यि जोडीले राज र जियाको सपोर्टीङ गरेका हुन्छन् । राजेश र करिश्मा श्रीमान-श्रीमतीको भुमीकामा प्रस्तुत भएका छन् । जो राजको दाई र भाउजु भएर देखिदै छन् । राजलाई अत्यन्त माया गरेका हुन्छ र उसको हरेक चाहना पूरा गरिदिने अनि उसको हरेक कुरामा साथ दिएका हुन्छन् ।
राजेश र करिश्मालाई लामो समयपछि अभिनय गराउन कत्तिको गार्हो भयो ?
- राजेश र करिश्मा भन्ने बित्तिकै उनिहरूको नाम नै प्रयाप्त छ । उहाँहरूलाई कुनै पनि दृश्यलाई एकपटक भन्दा दुई पटक भनिरहनु पर्दैन । एकदम सहज तरिकाले अभिनय गर्नु हुन्छ । किनभने उहाँहरूमा परिपक्वता छ ।
राजेश र करिश्माको जोडीलाई चलचित्रमा राख्नुको कारण ?
- नेपाली चलचित्रप्रेमि दर्शकको चाहना थियो कि यो जोडीलाई पुन: नेपाली चलचित्रमा देख्न पाईयोस् । त्यसैले मेरो भन्दा पनि दर्शकको चाहनालाई मध्य नजर राखेर मैले यो जोडीलाई प्रस्तुत गरेको हुँ । लामो समय पछि र दर्शकको चाहना बमोजिम मैले यो जोडीलाई चलचित्रमा प्रस्तुत गर्न पाउँदा म आफूलाई पनि भाग्यमानी ठानेको छु ।
चलचित्रका गितसंगित के कस्ता छन् ?
- यसको गितसंगित एकदमै राम्रो छ । अहिलेका जल्दाबल्दा संगितकार सुरेश अधिकारीले निकै नै मेहनत गर्नुभएको छ । यसैगरि गायन क्षेत्रका सफल जोडी राजेश पायल राई र अञ्जु पन्तको स्वरले यसको गितसंगितमा मधुरता छाएको छ । अर्को खुसीको कुरा त यस चलचित्रमा देशबिदेशमा सबैको मनमा छुट्टै छबि बनाएर चर्चा कमाएका पप गायक एड्रिन प्रधानलाई पनि प्रस्तुत गरेको छु र उहाँको गित पनि अत्यन्त राम्रो भएको छ । चलचित्रका गित जसरी राम्रा छन् त्यसै गरी यसको छायाँकनमा पनि हामिले धेरै नै मेहनत गरेका छौं । जोमसोममा गएर यसको ३ वटा गितको छायाँकन पनि गरेका छौं । दु:ख पनि निकै पायौं र गितको भिडियो पनि अत्यन्त राम्रो बनेको छ । नृत्यनिर्देशक बसन्त श्रेष्ठले पनि अत्यन्त मेहनत गर्नुभएको छ ।
