नेपाली रजतपटमा महिला निर्मात्रीको रूपमा एउटा नयाँ आयाम हुन् कृषा चौलागाईं । सबैभन्दा कान्छी निर्मात्रीको रूपमा नेपाली चलचित्र क्षेत्रमा पाईला टेकेकी निर्मात्री कृषाले करिब २० बर्षको उमेरमा 'ईन्साफ' नामक चलचित्र निर्माण गरेकी थिईन् । अहिले उनैले निर्माण गरेको अर्को चलचित्र 'कसम हजुरको' प्रदर्शनको तयारीमा रहेको छ । 'कसम हजुरको' प्रदर्शन सँगसँगै उनले पुन: अर्को चलचित्र निर्माण गर्ने घोषणा गरेकी छिन् । निर्मात्री भएर पनि आफ्नै थुप्रै शुभचिन्तक रहेको बताउने कृषाले चलचित्र निर्माणसँगै नयाँ जीवनसाथीको खोजी गरेको खुलासा गरेकी छिन् । बिबाह गर्ने उमेर हुन लागेको बताउने कृषाले अहिले सम्म कोही माग्न नआएको बताईन् । काम प्रति लगाव भएको र आफूलाई बुझ्न सक्ने केटा पाए बिबाह गर्ने सोच बनाएकी निर्मात्री कृषासँग फिल्मीखबर डटकमले गरेको कुराकानी –
चलचित्र क्षेत्रमा तपाईको प्रवेश कहिले भयो ?
२०६३/०६४ साल तिर चलचित्र 'ईन्साफ' बाट नेपाली रजतपटमा पाईला टेकेकी हुँ ।
पहिलो चलचित्र 'ईन्साफ' बाट कस्तो प्रतिक्रिया पाउनु भयो ?
'ईन्साफ' बाट सोचे जस्तो सफलता पाउन नसके पनि अनुभव भने प्रसस्त पाएँ । यहि अनुभवबाट नै अहिले २ चलचित्रको निर्मात्री भएकी छु ।
यो क्षेत्रमा आउनुको कारण ?
पहिलो कारण त व्यवसाय नै हो र दोस्रो कारण नाम हो ।
त्यसो भए नाम र दाम कत्तिको कमाउनु भयो त ?
अहिले त शुरूवातको क्रममा नै छु तर पनि मैले सोचेभन्दा बढी शुभचिन्तकहरू पाएकी छु । अहिले त्यो भन्दा बढी आश पनि गरेकी छैन ।
निर्मातको कत्तिको फ्यान हुन्छन् जस्तो लाग्छ ?
हुनत त कलाकारहरूको जस्तो निर्माता निर्देशकको फ्यान त हुँदैनन् तर पनि मलाई माया गर्ने थुप्रै हुनुहुन्छ । मलाई भेट्न चाहने धेरै शुभचिन्तकहरू हुनुहुन्छ । प्रेमप्रस्ताव राख्नेहरू पनि थुप्रै हुनु हुनुहुन्छ । एकदिन त नवलपरासीबाट एकजना लभलेटर र सिडी लिएर मलाई भेट्न आउनु भएको थियो । तर दुर्भाग्य मैले उहाँलाई प्रत्यक्ष भेट्न पाईन ।
कस्तो अनुभव गर्नु भयो र के प्रतिक्रिया दिनु भयो त ?
एकदमै खुसी लाग्यो । पर्दापछाडी रहने चलचित्र कर्मीलाई पनि माया गर्ने धेरै चलचित्र प्रेमी दर्शकहरू हुनुहुँदो रहेछ । मैले उहँको लभलेटरको प्रतिक्रिया दिन पाएकी छैन । अब भेटें भने धन्यबाद भएपनि भन्छु ।
कति बर्षकी हुनु भयो ?
बिबाह गर्ने उमेर भएको छ तर अहिले सम्म कोही माग्न आएको छैन ।
बिबाह गर्न मन लागेकै हो त ?
(हाँस्दै) म सँगैका साथीहरूले बिबाह गरेर पनि बुवाआमा भईसकेका छन् । उनीहरूको देखेर गरूँ गरूँ त लाग्छ तर खै कोही पनि माग्न आउँदैनन् ।
जीवनसाथी कस्तो होस् भन्ने चाहनु हुन्छ ?
(लजाउँदै) तपाईं जस्तै । काम प्रति लगाव भएको, धेरै माया गर्ने र मेरो फिल्डलाई बुझ्न सक्ने केटालाई नै म आफ्नो जीवनसाथी बनाउछु ।
हुनेवाला जीवनसाथी कुन फिल्डको होस् भन्ने छ ? 
जुन फिल्डको भएपनि हुन्छ तर सकेसम्म आफ्नै फिल्डको भए राम्रो । किनकी यो फिल्डलाई राम्रो सँग बुझेको त हुन्छ ।
तपाईको सबैभन्दा नजिकका साथीहरू ?
रेखा थापा, शिबम् अधिकारी, छबि ओझा, सुमन गैरे, सबिर श्रेष्ठ र प्रकाश सुबेदी ।
जीवनमा कसैसँग प्रेम गर्नु भएको छ ?
केही समय अगाडी सम्म गरेकी थिएँ तर अहिले हामी नदीका दुई किनारा भईसकेका छौं ।
किनारा लाग्नुको कारण ?
समय ।
माया त अझै लाग्छ होला नि ?
म त्यो बिगत सम्झन चाहन्न । उ मेरो अतित थियो अब बर्तमानको खोजीमा छु ।
चलचित्रमा लगानी गर्ने पैसा कहाँबाट प्राप्त गर्नुभयो ?
निर्मात्रीको रूपमा मेरो नाम रहे पनी सम्पूर्ण खर्च मेरो बुवाआमाले गर्दिनु भएको हो । मलाई बिस्वास गरेर यति धेरै सहयोग गर्दिनु भएको छ । त्यसैले पनि उहाँहरूलाई मैले भगवान नै मान्छु ।
'कसम हजुरको' कस्तो चलचित्र हो ?
'इन्साफ' पछी सिकेका अनुभवहरू संगालेर बनाएको चलचित्र हो यो । बिशेष गरि अहिलेका युवायुवतीहरूलाई केन्द्रित गरेर निर्माण गरिएको त्रिकोणात्मक चलचित्र हो 'कसम हजुरको' । यसमा 'टिनेजर्स' मा हुने प्रेम प्रसंगलाई देखाउन खोजिएको छ ।
कहिले सम्ममा प्रदर्शन हुन्छ ?
बैशाख र जेष्ट महिनाको बिचमा प्रदर्शन गर्ने योजना छ ।
तपाईको चलचित्रको कुन पक्षले दर्शकको ध्यान केन्द्रित गर्ला ?
गीतसंगित, कथाबस्तु, प्रस्तुती, कलाकारको अभिनयले नै मेरो चलचित्रको मुख्य अकर्षण हो ।
अब यसपछी कुन चलचित्र निर्माण गर्दै हुनुहुन्छ ?
अब बन्ने चलचित्र 'के म तिम्रो साथी बन्न सक्छु' पनि प्रेमकथामा नै आधारित हुनेछ । शिबम् अधिकारीले कथा लेख्नु भएको छ । अबको चलचित्रको लागी निर्देशनको जिम्मा सबिर श्रेष्ठलाई दिएकी छु । त्यसैगरी संगितको लागी संगितकार दिनेश सोनामलाई लिएकी छु भने अन्य प्राबिधिक र कलाकारको छनोट हुन बाँकी नै छ ।
अहिले प्रदर्शन भईरहेका चलचित्रहरू एकपछी अर्को गरेर असफल हुँदै जानुको मुख्य कारण के होला ?
कथा, गीतसँगित, प्रस्तुती र कलाकारको 'केमेष्ट्री' मिलेन भने चलचित्र राम्रो बन्दैन अनि चलचित्र चल्दैन ।
नेपाली चलचित्र 'ग्लोबल मार्केट' मा पुग्न नसक्नुको कारण ?
गुणस्तरीय चलचित्र निर्माण हुन नसक्नु, पुरानै धारमा चलचित्र बन्नु, 'ग्लोबल मार्केट' को बारेमा राम्रो ज्ञान नहुनु र अधिकांश चलचित्रकर्मीहरूमा शिक्षाको कमि हुनुले पनि नेपाली चलचित्र 'ग्लोबल मार्केट' मा पुग्न सकेको छैन ।
महिला निर्मात्री हुनुको पिडा ?
महिला हुँदैमा पिडित हुन्छन् भन्ने छैन । म कतैबाट पनि पिडित छैन । शुरूका दिनहरूमा नबुझ्दा केहि दु:ख भएपनि अहिले खासै दु:ख पाएकी छैन । सानी छु त्यसैले सबैले माया गर्छन् । सबैको सहयोग पाईरहेकी छु त्यसैले खुसी छु ।
