एक्सन नायक विराज भट्टको समय राम्रो चलेको बखत उनको स्वीकृतीमा नायिका जेनिशा केसीले धेरै नेपाली फिल्ममा काम गर्ने मौका पाइन् । यतिसम्मकी उनीहरुको निकटताका कारण विराज र जेनिशाको अफेयरको हल्ला समेत खुबै चलेको थियो । नचलोस् पनि कसरी किनकी विराजका प्राय फिल्ममा जेनिशा लिड रोलमा हुन्थिन् । 'तिमी विनाको जीवन', 'भागी भागी नजाउ', 'मैले भुल्नै सकिन', 'दोस्ती', 'अमर प्रिति' लगायतका फिल्ममा विराजको जोडी बनेर नायिका जेनिशा केसीले काम गरिसकेकी छिन् । 

 

लगभग ६ वर्षअघि फिल्म 'गिरफ्तार' बाट रजतपटमा डेब्यु गरेकी जेनिशाका प्रारम्भिक दिन निकै सुखद रहे। त्यसताका एक्सन हिरोका रूपमा स्थापित विराट भट्ट र जेनिशाको केमेस्ट्री रुचाइएको थियो। उनीहरूको सम्बन्धको चर्चा पनि त्यत्तिकै भयो। संयोग नै भनौं, विराज भोजपुरी फिल्मतिर लागेपछि जेनिशा पर्दामा निकै सुस्ताइन्। 

 

जेनिशा अभिनित पछिल्लो फिल्म 'एक्सन' र 'एक पल' गएको बर्ष रिलिज भएको थियो तर घरेलू बजारमा यी दुवै फिल्मले कमाल नगर्दा जेनिशालाई ओरालो लाग्दै गरेको आफ्नो करिअर जोगाउन झनै गाह्रो पर्यो । विराज भट्ट भोजपुरी फिल्ममा व्यस्त हुँदा जेनिशाका दुखका दिन सुरु भएका हुन् । जब नेपाली फिल्ममा विराजको साथ उनले पाइनन् तबदेखि उनी अभिनित कुनै पनि फिल्मले बजार पिट्न सकेका छैनन् । अहिले उनलाई आफ्नो फिल्ममा लिनका लागि निर्माताहरु स्क्रिप्ट बोकेर उनको घरको ढोका ढकढकाउन त परै जाओस् नायिकाको नाम लिँदा समेत उनी अन्तिम सूचीमा पर्दिनन् । 

 

संख्यात्मक हिसाबले हेर्ने हो भने दर्जन बढी सिनेमामा काम गरिसकेकी जेनिशाको विराज भट्टसँगका फिल्म बाहेक अन्य कुनै पनि फिल्म हिटको सूचीमा दर्ता भएका छैनन् । नेपाली फिल्ममा दिन प्रतिदिन आफ्नो करिअर ओरालो लाग्न थालेपछि अहिले उनी बलीउडमा आफुलाई स्थापित गराउने तयारीमा छिन् । खबरका अनुसार, अहिले जेनिशा बलीउड अभिनेत्री प्रियंका चोपडाको लगानीमा निर्माण भएको भोजपुरी फिल्म ‘काशी अम्मरनाथ’ मा भोजपुरीका सुपरस्टार रवि किसनसँग काम गरिरहेकी छिन् । खासमा, उनले यो फिल्मका लागि अडिसन दिएकी थिइन् र अडिसनबाट पास भएपछि यो फिल्ममा काम गर्ने मौका पाएकी हुन् । 

 

नेपाली फिल्मबाट पेट पाल्नै मुश्किल हुन थालेपछि बलीउडको बाटो रोजेकी जेनिशाका लागि यो यात्रा कतिको उपलब्धि मुलक रहन्छ त्यो त समयले देखाउनेछ । अहिले उनी भारतीय टिभी सिरियलमा पनि मौका पाए काम गर्ने सोचमा छिन् । अब विस्तारै नेपाली फिल्मबाट टाढा बन्दै गएकी जेनिशालाई हाइटले पनि नराम्रो धोका दिएको छ । नेपालका नायकहरुसँग हाइटकै कारण जोडी नमिल्ने भएका कारण जेनिशाले एकपछि अर्का राम्रा नेपाली फिल्महरु गुमाउँदै जानु परेको छ । जेनिशा ५ फिट ७ इन्च अग्ली छिन् ।