संगीता श्रेष्ठले निर्देशनमा डेब्यू गरेको फिल्म ‘कथा काठमाण्डु’ को छायांकन २३ दिनमा सकिएको छ । मंगलबारबाट फिल्मको सम्पूर्ण छायांकन सकिएको संगीताले बताइन् । संगीताले भनिन्–‘हामीले ३ चरणमा चलचित्रको छायांकन गरेका छौ । जम्मा २३ दिन फिल्म खिचिएको छ ।’ रिलिज डेट फाइनल नगरिएको यो फिल्ममा प्रियंका कार्की, आयुष्मान देसराज जोशी, संजोग कोइराला, सन्ध्या केसी, प्रेक्षा अधिकारी, प्रमोद अग्रहरीको मुख्य भूमिका छ ।

 

 

संगीताले भनिन्–‘यो फिल्म भित्र ३ वटा कथा छ । तर, तिनै वटा कथाका पात्रको कनेक्शन एक अर्कासँग छ । हामीले नेपाली फिल्ममा पहिलो पटक यस्तो कथामा सिनेमा बनाएका छौ ।’ उनका अनुसार, प्रियंकाको कथाको कनेक्शन सन्ध्यासँग र सन्ध्याको कथाको कनेक्शन आयुष्मानसँग छ । आहाना फिल्मस्को ब्यानरमा निर्माण भएको चलचित्रमा विजय राइको लगानी छ ।

 

 

फिल्मको छायांकन सकिएसँगै निर्माणपक्षले केही तश्वीरहरु सार्वजनिक गरेको छ । तश्वीरमा संजोग र सन्ध्या कलेजको पहिरनमा देखिएका छन् । यस्तै, तश्वीर हेर्दा लाग्छ नायिका प्रियंका कार्की र कलाकार प्रमोद अग्रहरीको कनेक्शन छ । गायिका इन्दिरा जोशीको पनि फिल्ममा विशेष भूमिका रहेको वुझ्न सकिन्छ । यही फिल्मको छायांकनको बेलादेखि नायिका प्रियंका कार्की र नायक आयुष्मान देसराज जोशी प्रेमसम्बन्धमा रहेको पनि खुबै हल्ला छ ।