फिल्म 'नोभेम्बर रेन' मा डल्लीको भूमिका निर्वाहा गरेपछि एकाएक चर्चामा आएकी नायिका छुल्ठिम गुरुङ अभिनित नयाँ फिल्म 'डायरी' जेष्ठ ५ गतेबाट अलनेपाल रिलिज हुँदैछ । 'नोभेम्बर रेन' पछि अन्य कुनै पनि फिल्म नखेल्ने घोषणा गरेकी छुल्ठिमलाई फिल्मी रसले यो क्षेत्रबाट टाढा राख्न सकेन । डल्ली क्यारेक्टर हिट भएपछि छुल्ठिमले केही बर्षको अन्तरालपछि आफ्नै लगानीमा फिल्म निर्माण गरेकी हुन् 'डायरी' ।
यो फिल्ममा उनको मुख्य भूमिकामा पनि छन् । नव-नायक सन्नी सिंहसँग फिल्ममा छुल्ठिमले रोमान्स गरेकी छिन् । पहिलो पटक 'डायरी' मार्फत भिलेन अवतारमा प्रस्तुत हुन लागेकी नायिका रेखा थापाका कारण पनि यो फिल्म अहिले प्रतिक्षित बनिरहेको छ ।
'नोभेम्बर रेन' मा केटाको जस्तो हाउभाउमा प्रस्तुत भएकी छुल्ठिमलाई दर्शकहरुले रियलमै केटा नसम्झेका होइनन् । तर, हामीसँगको कुराकानीको क्रममा उनले आफु रियलमा केटी नै भएको बताइन् । उनले भनिन्, 'नोभेम्बर रेनमा मैले निर्वाहा गरेको भूमिका केटाको जस्तो थियो । त्यो मैले निर्वाहा गरेको क्यारेक्टर मात्र थियो । तर मलाई बाहिर जाँदा, काहिँ बोल्नु पर्दा धेरैले तपाई 'नोभेम्बर रेन' को डल्ली होइन भनेर सोध्नुहुन्छ । दर्शकहरुलाई सायद म रियलमा केटा नै पो होकी भन्ने लाग्छ होला तर रियलमा चाहिँ म केटी नै हो ।'
उनले आफू 'डायरी' मा जोयाको भूमिकामा देखिएको खुलाइन् । उनले भनिन्, 'डायरीमा म फिल्मी स्टाइलकी यूवतीको भूमिकामा देखिएकी छु । फिल्म लभस्टोरी र एक्सनलाई जोडेर तयार गरिएको हो ।' उनले 'डायरी' मा दर्शकहरुले विना स्वार्थको प्रेम महशुस गर्ने पनि बताइन् ।
छुल्ठिम इन्टरटेनमेन्ट र एयर क्रु प्रोडक्सनले संयुक्त रुपमा निर्माण रहेको फिल्मलाई 'आवरण' फिल्म मार्फत् निर्माताको रुपमा फिल्ममा प्रवेश गरेका अनिल योन्जनले 'डायरी' निर्देशन गरेका हुन् । फिल्ममा कथा छेतेन गुरुङको छ ।
