दर्जनौं हिट फिल्मकी कोरियोग्राफर रेनेशा वान्तवा राईले फिल्म निर्देशनमा डेब्यू गरेको फिल्म 'इन्टु मिन्टु लण्डनमा' को शुक्रवार औपचारिक रुपमा निर्माण घोषणा गरिएको छ । साम्राज्ञी राज्यलक्ष्मी शाहको लिड रोल रहने फिल्ममा धिरज मगर, विवेक लिम्बू, शारुक ताम्राकार, सुनिशा बजगाइँ लगायतका कलाकारहरुको पनि मुख्य भूमिका रहनेछ ।
काठमाडौं र यूकेमा छायांकन हुने यो फिल्ममा साम्राज्ञी 'मिन्टु' र धिरज 'इन्टु' को भूमिकामा रहनेछन् । फिल्मको निर्माण घोषणा कार्यक्रममा बोल्दै रेनेशाले भनिन्, 'फिल्म निर्देशन मेरो यो पहिलो भएपनि दर्शकहरुलाई निराश बनाउने छैन् । मेरो कोरियोग्राफीलाई जसरी आम दर्शकहरुले रुचाउनुभएको थियो त्यसरी नै फिल्मलाई पनि उत्कृष्ट बनाउने मेरो प्रयास रहनेछ ।'
प्रभु शमशेर जबरा र प्रज्जवल शम्सेर जबराको लगानी रहने फिल्ममा सह-निर्माताको रुपमा सुलेखा राई, बसन्त तामाङ, सुस्मिता जिरेलको रहेका छन् । फिल्मको कथा रेनेशा र प्रज्जवलले मिलेर तयार पारेका हुन् ।
नायिका साम्राज्ञी राज्यलक्ष्मी शाहले 'इन्टु मिन्टु लण्डनमा' को स्क्रिप्ट निकै मनपरेका कारण काम गर्न लागेको बताइन् । उनले भनिन्, 'यो फिल्म गर्ने फाइनल मेरो 'ए मेरो हजुर २' गर्दादेखि नै भएको थियो । 'ए मेरो हजुर २' को 'कसम हो' गीतको भिडियोमा रेनेशाको कोरियोग्राफी देखेर म निकै प्रभावित भएकी थिएँ । उहाँको कोरियोग्राफी जति अब्बल छ त्यो भन्दा पनि फिल्म राम्रो हुन्छ भन्नेमा म ढुक्क छु ।' साम्राज्ञीको बर्ष २०७२ मा रिलिज भएको अनमोल केसी स्टारर फिल्म 'ड्रिम्स' पछि अन्य कुनै पनि फिल्म हलमा लागेका छैनन् । 'ड्रिम्स' पछि साम्राज्ञीले 'तिमीसँग', 'मंगलम' मा काम गरिसकेकी छिन् ।
रोमान्टिक ड्रामा बताइएको यो फिल्ममा साम्राज्ञीको अपोजिटमा धिरज मगर देखिँदैछन् । उनको यो डेब्यू फिल्म हो । धिरजले 'इन्टु मिन्टु लण्डनमा' को स्क्रिप्ट उत्कृष्ट रहेको र फिल्म पनि राम्रो बन्नेमा विश्वस्त रहेको बताए । फिल्मको छायांकन जुन १६ देखि अगष्ट ७ सम्म हुनेछ ।
