नेपाल चलचित्र कलाकार संघले दोस्रो पटक आयोजना गर्न लागेको ‘फान अवार्ड २०७३’ को घोषणा गरिएको छ । सोमवार राजधानीमा एक कार्यक्रमका बीच संघका अध्यक्ष रामकेशर बोगटीले दोस्रो ‘फान अवार्ड’ चैत १६ गते हुने जानकारी दिए ।
२४ विधामा वितरण गर्न लागिएको अवार्डलाई ‘कि एडभरटाईजिङ’ एजेन्सीले व्यवसायिक सहकार्य गरेको छ । आर्मी अफिसर्स क्लबमा हुने अवार्डलाई भव्य र सव्य रुपमा सम्पन्न गर्न कुनै कसर बाँकी नराख्ने अध्यक्ष बोगटीले बताए ।
उत्कृष्ट कथा, उत्कृष्ट पटकथा, उत्कृष्ट संवाद, उत्कृष्ट नृत्य निर्देशक, उत्कृष्ट द्वन्द्व निर्देशक, उत्कृष्ट गीतकार, उत्कृष्ट गायक, उत्कृष्ट गायिका, उत्कृष्ट संगीतकार, उत्कृष्ट सम्पादक, उत्कृष्ट छायाँकार, उत्कृष्ट नव-निर्देशक, उत्कृष्ट चरित्र अभिनेता, उत्कृष्ट चरित्र अभिनेत्री, उत्कृष्ट नव-अभिनेत्री, उत्कृष्ट नव-अभिनेता, उत्कृष्ट सह-अभिनेत्री, उत्कृष्ट सह-अभिनेता, उत्कृष्ट खल पात्र, उत्कृष्ट हास्य कलाकारको विधामा ‘फान अवार्ड’ वितरण गरिने छ ।
यस्तै, अवार्डमा उत्कृष्ट अभिनेत्री, उत्कृष्ट अभिनेता, उत्कृष्ट चलचित्र र उत्कृष्ट निर्देशकको विधामा पनि छ । दोस्रो ‘फान अवार्ड’ को घोषणा सभामा ‘कि एडभरटाईजिङ’ का नवनिर्वाचित कार्यसमितिलाई कलाकार संघले सम्मान पनि गर्यो ।
पछिल्लो समय अवार्डप्रति चलचित्रकर्मीहरुको चासो कम हुँदै गएको छ । कलाकार संघले आयोजना गर्न लागेको ‘फान अवार्ड’ को घोेषणा कार्यक्रममा नै निकै न्यून संख्यामा कलाकारहरु उपस्थित थिए । यसबाट नै प्रष्ट हुन्छ कि कलाकारले अवार्डलाई हेर्ने नजर कस्तो छ ।
