'बाहुबली' स्टार प्रभासको नयाँ फिल्म ‘साहो’ को फर्स्टलुक पोष्टर सार्वजनिक भएसँगै दर्शकको मनमा उत्सुकता बढेको छ । फिल्मको पोष्टरमा उनले आफ्नो आधा अनुहार पछ्यौराले छोपेका थिए ।
यस्तैमा अभिनेत्री श्रद्धा कपूरको लुक्सले पनि दर्शकमा थप कौतुहलता बढाएको छ । श्रद्धा यो फिल्मबाट तेलुगू फिल्ममा आफ्नो यात्रा सुरु गर्दैछिन् । फिल्ममा प्रभास मुख्य भूमिकामा छन् । सेलिब्रेटी मेकअप आर्टिस्टले इन्स्टाग्राममा श्रद्धाको फर्स्टलुक शेयर गरेकी छिन् ।
तर, श्रद्धाले भने कुनै तश्बिर शेयर गरेकी छैनन् । हिन्दी, तमिल र तेलुगूमा पनि यो फिल्म खिचिएको छ । ‘साहो’ को एक्सन सिन स्तरिय बनाउन निर्माताले करोडौ खर्च गरेका छन् ।
फिल्ममा ज्याकी श्राफ, मन्दिरा बेदी र नील नीतिन मुकेश पनि प्रमुख भूमिकामा छन् । फिल्मको निर्माण यूवी क्रियशनका वामसी, प्रमोद र विक्रमले गरिरहेका छन् ।
सुजीत निर्देशित ‘साहो’ एक थ्रिलर सस्पेन्स फिल्म हो । फिल्मले एक योद्धाको कथा बोल्नेछ । फिल्मको बजेट १५० करोड बताइएको छ ।
