बलिउडमा रिमेकको ट्रेन्ड चलिरहेको समयमा तमिलको सुपरहिट फिल्म ‘थडम’ को पनि हिन्दी रिमेक निर्माण हुने भएको छ । डेब्यूटेन्ट वर्धनको निर्देशनमा बन्न लागेको रिमेक फिल्ममा अभिनेता आदित्य रोय कपूर लिड रोलमा देखिनेछन् । फिल्ममा उनको दोहोरो भूमिका हुनेछ । उनले आफ्नो अभिनय करिअरमा पहिलो पटक पूरै अलग-अलग दुई चरित्र निर्वाह गर्न लागेका हुन् ।
हालै एक अन्तर्वार्तामा आदित्यले ‘थडम’ को हिन्दी रिमेकको बारेमा भनेका छन्, ‘म यो रोमान्चक स्टोरी सुनेपछि निकै प्रेरित र उत्साहित छु । यसको ओरिजिनल फिल्म निकै इन्टरटेनिङ र रोचक थियो, जसले दर्शकमा आफ्नो गहिरो प्रभाव छाडेको थियो ।’ टि-सिरिजका भूषण कुमार र मुराद खेतानीले संयुक्त रुपमा निर्माण गर्ने फिल्मको छायांकन यसै वर्षको सेप्टेम्बरबाट सुरु हुँदैछ ।
तमिल फिल्म ‘थडम’ सन् २०१९ मा रिलिज भएको थियो । जसमा अरुण विजय, विद्या र तान्या होपे मुख्य भूमिकामा थिए । यो फिल्म एक मर्डरको अनुसन्धानमा आधारित छ, जसको अनुसन्धानको क्रममा पुलिसलाई निकै ठूला समस्या आउँछ । यो केसमा दुई जुड्वा व्यक्ति संदिग्ध बन्छन्, जो एक अर्कासँग पूरै अन्जान हुन्छन् । फिल्म बक्सअफिसमा ब्लकबस्टर सावित भएको थियो ।
