झरना थापा निर्देशित फिल्म ‘ए मेरो हजुर ४’को दोस्रो गीत सार्वजनिक भएको छ । मंगलवार नारी दिवसको अवसरमा निर्माण टिमले ‘सुन्तला’ बोलको गीत यूट्युबमा सार्वजनिक गरेको हो । वसन्त सापकोटाको शब्द तथा संगीत रहेको गीतमा मेलिना राई र निशान भट्टराईको युगल स्वर छ । डान्सिङ नम्बरको गीतमा अनमोल केसी, सुहाना थापा र सलोन बस्नेतले ठुम्का लगाएका छन् ।
कविराज गहतराजको कोरियोग्राफी रहेको गीतलाई सञ्जय लामाले खिचेका हुन् । गीतको अडियो र भिडियो दुवै पक्ष बलियो छ । यसअघि सार्वजनिक भएको ‘फूलको थुंगा हौकि’ बोलको गीतमा अनमोलको नृत्यको आलोचना भएको थियो । तर, ‘सुन्तला’ गीतमा उनको नृत्यमा सुधार भएको देखिन्छ, यसको श्रेय कविराजलाई जान्छ । यो फिल्म आउँदो बैशाख १ गतेबाट प्रदर्शनमा आउँदैछ ।
मित्र डि. गुरुङको सम्पादन, रामजी लामिछानेको कोरियोग्राफी, शैलेश श्रेष्ठको ब्याकग्राउन्ड स्कोर र हिमाल केसीको द्वन्द्व निर्देशन रहेको फिल्मको कथा झरना थापा र स्वर्गीय छेतन गुरुङले मिलेर लेखेका हुन् । पटकथा र संवादमा उनीहरुलाई मन्दिप गौतम, प्रतिक पौडेल, बाबुराम दाहाल, उपकार पाण्डे र माधव शर्माले सघाएका छन् । सुनिल कुमार थापा फिल्मका एक्ला निर्माता हुन् ।
