यस वर्षको समीक्षात्मक रुपमा अब्बल ठहरिएको फिल्म ‘ऐना झ्यालको पुतली’का लेखक, निर्देशक तथा निर्माता सुजित बिडारीले सुर्खेतमा मास्टरक्लास दिने भएका छन् । ११औँ ‘नेपाल युरोपेली युनियन चलचित्र महोत्सव’को अन्तिम दिन उनले फिल्मकर्मीलाई फिल्म मेकिङ सम्बन्धि क्लास दिने भएका हुन् । महोत्सव यस पटक काठमाडौँका साथै पहिलो पटक सुर्खेतमा हुन लागेको हो ।
कात्तिक १९ गते सुरु भएर २२ गते सकिने महोत्सवको अन्तिम दिन सुजितले मास्टरक्लासमा आफ्नो अनुभव बाँड्नेछन् । फिल्मको कथादेखि त्यसलाई खिच्ने तरिकासम्मको बारेमा वृहद् छलफल गरिने उनले बताए । उनले भने, ‘मास्टरक्लासमा मैले फिल्मको आइडियादेखि त्यसलाई कथा हुँदै पटकथामा कसरी रुपान्तरण गर्ने र दृश्यमा कसरी ढाल्ने भन्ने बारेमा आफ्नो अनुभव बाँड्नेछु ।’
सुर्खेतको मध्यपश्चिम विश्वविद्यालयको हलमा चार दिन चल्ने महोत्सवमा ५ युरोपियन र ३ नेपाली फिल्म प्रदर्शन हुनेछन् । ३ नेपाली फिल्ममा सुजित बिडारीको ‘ऐना झ्यालको पुतली’ पनि छ । सुजितले मास्टरक्लासको दौरानमा आफू निर्देशित ‘सावित्री’सँगै विश्व प्रसिद्ध सर्ट फिल्म पनि देखाउनेछन् । महोत्सव काठमाडौंमा भने कात्तिक ११ देखि १५ गतेसम्म चलचित्र विकास बोर्डमा हुनेछ ।
