सोमबार फिल्म ‘ऐंचो पैंचो’को ट्रेलर रिलिज कार्यक्रममा उद्घोषक नरेश भट्टराईले स्वस्तिमा खड्कालाई ‘नम्बर वान अभिनेत्री’को रुपमा सम्बोधन गरे । नरेश उनै हुन्, जसले अभिनेता अनमोल केसीलाई ‘मेगास्टार’को उपाधि दिएका थिए । स्वस्तिमालाई उनले ‘नम्बर वान अभिनेत्री’को रुपमा सम्बोधन गर्नुको पछाडि उनी एक्लैले आफ्नो काँधमा फिल्म बोक्न सक्छिन् भन्ने अर्थ लुकेको छ ।

तर, उनको बुझाईमा कोही एकजना कलाकारले फिल्म काँधमा बोकेर हिँड्न सम्भव छैन । उनी भन्छिन्, ‘म एक्लैले फिल्म काँधमा बोकेर हिँड्न सम्भव छैन । म एक्लैले फिल्म काँधमा बोक्छु भन्न पनि मिल्दैन । फिल्म एकजना मान्छेले बन्ने होइन । न त एकजना मान्छेले फिल्म चलाउँछु भनेर चल्छ न राम्रो बनाउँछु भनेर बन्छ । लेखकदेखि कलाकार सबैको काम र जिम्मेवारी उतिक्कै हुन्छ ।’

मिडियामा आफ्नो अनुहार बढी आउने भएकाले फिल्मलाई आफूले काँधमा बोकेको भन्ने विश्लेषण भएको हुनसक्ने उनको ठम्याई छ । तर, उनलाई आफूले फिल्म काँधमा बोकेर हिँडेको छु भन्ने चाहिँ लाग्दैन । फिल्म राम्रो भए क्रेडिट लिने र नराम्रो भए सबै भार आफूले लिने भन्ने पनि नहुने उनको भनाई छ । यद्यपि, मिडियामा हुने विश्लेषणले केही दबाब भने थप्ने स्वस्तिमा स्वीकार गर्छिन् ।

आगामी भदौ १४ गतेबाट प्रदर्शनमा आउन लागेको ‘ऐंचो पैंचो’मा स्वस्तिमा युवा राजनीतिज्ञको भूमिकामा रहेको ट्रेलरले प्रष्ट्याउँछ । ट्रेलर र पोस्टरमा उनलाई दिइएको प्राथमिकताले फिल्मको मूल कथा उनको चरित्रमा केन्द्रित रहेको बुझिन्छ । कृषा चौलागाईंको निर्देशनमा बनेको फिल्ममा वर्षा राउत, मुकुन भुषाल, सुशील सिटौला, कोशिस क्षेत्री, रमेश बुढाथोकीको पनि अभिनय रहेको छ ।