भनिन्छ नि, ‘जोगले हुन्छ भेट ।’ करिब २ दशकअघिको ब्लकबस्टर फिल्म ‘हामी तीन भाई’ जोडीको भेट पनि यसरी नै भएको छ । फिल्ममा तीन जोडी थिए, राजेश हमाल-रेखा थापा, श्रीकृष्ण श्रेष्ठ-झरना थापा र निखिल उप्रेती-नन्दिता केसी । यी तीन जोडीमध्ये निखिल र नन्दिताको भेट करिब एक दशकपछि अमेरिकाको न्यूयोर्क शहरमा भएको छ । त्यो पनि एक अवार्डको सिलसिलामा ।
आइतबार सम्पन्न छैटौं ‘ग्लोबल नेपाली फिल्म अवार्ड’मा सहभागी हुन निखिल अमेरिका पुगेको मौकामा नन्दितासँग भेट जुरेको हो । नन्दिता लामो समयदेखि अमेरिकामा बस्दै आएकी छन् । उनले निखिलसँग भेट भएको तस्विर फेसबुकमा पोष्ट गर्दै ‘हामी तीन भाई’को जोडी भनेर उल्लेख गरेकी छन् । उनको पोस्टको कमेन्टमा केहीले फिल्मको ‘तिर्खा लागे निरमाया’ गीत सम्झिएका छन् ।
रोचक संयोग के जुरेको छ भने अमेरिकामा निखिल र नन्दिताको भेट हुँदा नेपालमा ‘हामी तीन भाई’ नाममै फेरि एकपटक फिल्म निर्माण भैरहेको छ, जसमा अघिल्लो श्रृंखलाका कोही कलाकार दोहोरिएका छैनन् । निखिल र नन्दिताले ‘हामी तीन भाई’का साथै ‘युद्ध’, ‘त्रिशुल’, ‘निशाना’, ‘कृष्णा’ फिल्ममा पनि काम गरेका छन् । तर, यो जोडीलाई दर्शकहरुले ‘हामी तीन भाई’बाटै सम्झन्छन् ।
केही वर्षयता निखिल र नन्दिता दुवै अभिनयमा सक्रिय छैनन् । नन्दिताले अमेरिका गएदेखि फिल्ममा काम गरेकी छैनन् । निखिल भने यस वर्ष नयाँ फिल्म निर्माणको तयारीमा छन् । अमेरिकामै एक युट्युब च्यानलसँगको अन्तरर्वार्तामा उनले आफू नयाँ फिल्मको तयारीमा रहेको र चाँडै लिएर आउने वाचा गरेका छन् । उनले आफू विशेष तरिकाले फिल्ममा आउन लागेको पनि बताएका छन् ।
