आगामी भदौ ८ गतेबाट प्रदर्शनमा आउन लागेको टेक पौरखी राई निर्देशित लभस्टोरी फिल्म ‘जय हो’को रोमान्टिक भावको नयाँ गीत सार्वजनिक गरिएको छ । ‘सपनाको वेडिङ्ग’ बोलको गीतमा फिल्मका मुख्य अभिनेता सलोन बस्नेतको शब्द, संगीत तथा स्वर रहेको छ । गीतको भिडियोमा उनी स्वयं रिसाएकी प्रेमिका केकी अधिकारीलाई गीत गाएर फकाइरहेको अवस्थामा चित्रित छन् ।

शोभित बस्नेत प्रस्तुतकर्ता रहेको फिल्ममा माओत्से गुरुङ, निशा अधिकारी, अर्पण थापा, सुमिन गुरुङ, सुशान्त श्रेष्ठ, कुमार थिङ र सुबि मगरको पनि अभिनय छ । सलोन सलिना फिल्म्सको ब्यानरमा निर्माण भएको फिल्मको निर्मातामा सुरज ल्वागन (सरकार) र राज के अधिकारी रहेका छन् । ‘जय हो’मा समावेश ‘म आगो भए तिमी पानी हुनुपर्छ’ बोलको गीत यतिबेला सर्वाधिक चर्चामा छ ।

यस फिल्ममा बनिश शाहको सम्पादन, सुरेश न्यौपानेको लेखन, शम्भुजित बाँस्कोटा र सागर आले मगरको संगीत, सम्राट बस्नेतको द्वन्द्व निर्देशन, कविराज गहतराज र रामजी लमिछानेको कोरियोग्राफी, सौरभ लामाको छायांकन र समीर मियाँको भीएफएक्स छ । ‘जय हो’माथि यतिबेला फिल्म क्षेत्रकै नजर अडिएको छ । फिल्मको बढ्दो चर्चाले बक्स अफिसमा सुखद प्रदर्शनको संकेत गर्छ ।