हलिउड भूमि अमेरिकामा नेपाली फिल्मकर्मीहरुको मात्र होइन, नेपाली फिल्म अवार्डको पनि उपस्थिति बढ्दो छ । अघिल्लो हप्ता मात्र न्यूयोर्क शहरमा ‘ग्लोबल नेपाली फिल्म अवार्ड’ आयोजना भएको थियो । चाँडै अमेरिकामा नै ‘नेफ्टा अवार्ड’को नयाँ संस्करण हुँदैछ । अब आगामी सेप्टेम्बर (२०२४)मा अमेरिकाको क्यालिफोर्नियामा ‘गोल्डेन नेपाली फिल्म अवार्ड’ आयोजना हुने भएको छ ।
यतिबेला अमेरिकामा रहेका अभिनेताद्वय शिव श्रेष्ठ र सुनील थापाको सम्मानमा सोमबार आयोजित ‘मिट-ग्रिट एन्ड विसेस् एक्सचेञ्ज म्यूजिक नाइट’ नामक कार्यक्रममा उक्त अवार्डको घोषणा गरिएको हो । खेलाडी तथा व्यावसायी यज्ञलाल श्रेष्ठको कम्पनी गोल्डेन स्टेट मुभी मेकर्सले अवार्ड आयोजना गर्नेछ । अवार्डको जुरी टिममा शिव श्रेष्ठ, सुनील थापा, दीपाश्री निरौला र लक्ष्मण सुवेदी छन् ।
गोल्डेन अवार्डले नेपाली फिल्मको गुणस्तरिय विकास, अन्तर्राष्ट्रिय बजार प्रवर्द्धन, विस्तार तथा कलाकारको सम्मानमा नयाँ आयाम थप्ने श्रेष्ठको विश्वास छ । उनले अवार्ड व्यवस्थित र निष्पक्ष हुने दाबी गरेका छन् । ‘हामी पूर्ण व्यवस्थित तथा निष्पक्ष तवरले अवार्ड गर्नेछौं,’ यज्ञलाल भन्छन्, ‘नेपाली फिल्म तथा कलाकारको अन्तर्राष्ट्रिय प्रवर्द्धन तथा विकासमा यो अवार्डले ठूलो भूमिका खेल्नेछ ।’
