गाईजात्राको छेको पारेर सुपरहिट ‘जात्रा’ फ्रेन्चाइजको तेस्रो श्रृंखला ‘महाजात्रा’को निर्माण घोषणासँगै स्टारकास्ट तथा प्रदर्शन मिति सार्वजनिक गरिएको छ । एउटा ट्रकको पछाडिको भागलाई चित्रित गरिएको पोस्टरमा फिल्मको प्रदर्शन मिति आगामी चैत ९ गते उल्लेख छ । अर्थात् फिल्म फागु पूर्णिमाको अवसर पारेर प्रदर्शनमा आउने भएको छ । चैत ११ र १२ गते फागुको विदा रहेको छ ।
फिल्ममा ‘जात्रा’ सिरिजकै चार कलाकारहरु विपिन कार्की, रविन्द्र सिंह बानियाँ, रविन्द्र झा र वर्षा राउत पुनः दोहोरिने भएका छन् । साथै, फिल्ममा कलाकार हरिवंश आचार्यको पनि अभिनय रहने भएको छ । पोस्टरमा चित्रित ट्रक पैसाको बिटोले भरिएको छ । यसले फिल्म पैसाको वरिपरि घुम्ने प्रष्ट्याउँछ । प्रदीप भट्टराईको लेखन तथा निर्देशनमा बन्ने फिल्म भदौपछि छायांकनमा जानेछ ।
षट्कोण आर्ट्सको ब्यानरमा निर्माण हुने यस फिल्मको निर्मातामा म्याक्स दिपेश खत्री र यत्रश्वर पौडेल छन् भने कार्यकारी निर्माता रविन्द्र सिंह बानियाँ हुन् । ‘जात्रा’ २०७३ सालमा प्रदर्शन भएको थियो भने यसको सिक्वेल (जात्रै जात्रा) २०७६ सालमा आएको थियो । दुवै श्रृंखला घरेलू बक्स अफिसमा सफल भएका थिए । ‘महाजात्रा’लाई पनि निर्माण अगावै ‘स्योर सट’ हिट भनिन थालिएको छ ।
