अभिनेता सारुक ताम्राकारको निधनपछि फिल्म ‘ह्यासट्याग माया’को निर्माण रोकिएको छ । उनी फिल्मका मुख्य कलाकार थिए । उनको धेरै सिन खिचिसकिएको थियो । अब फिल्म निर्माण हुने सम्भावना न्यून देखिएको छ । किनकि, टिम नै फुटिसकेको छ । फिल्मकी अभिनेत्री नम्रता श्रेष्ठको बारेमा निर्देशक राजीव गुरुङ विभिन्न तथ्यहरु सार्वजनिक गरेपछि ठूलो उथल-पुथल आएको छ ।
यसैक्रममा, ‘ह्यासट्याग माया’की असिस्टेन्ट डाइरेक्टर शान्ति तामाङले नम्रताप्रति लक्षित गर्दै विभिन्न आरोप लगाएकी छन् । उनले फेसबुकमा २४ वटा बुँदामा स्टाटस लेख्दै कसैको नाम उच्चारण नगरी व्यक्तिगत टिस्यूदेखि मसाजको बिलसम्म निर्मातालाई तिर्न लगाएको उल्लेख गरेकी छन् । आफ्नै सहकर्मीलाई गिराएर सबैको अघि गाली-बेइज्जती गरेको आफूले देखेको उनको भनाई छ ।
‘मायाको नाममा नौटंकी गर्दै सबैको अघि चर्तिकला देखाउँदै बसेको र माया गर्ने मान्छे छेउमा बसेर टुलुटुलु हेरिरहेको पनि देखियो । सोझो मान्छेको मुखमा कतिसम्म घोचो गर्दोरहेछ मौका पायो भने मान्छेले, त्यो पनि हेरियो र भोगियो,’ उनले लेखेकी छन्, ‘सेटमा आउने टाइमशीटको समयलाई लात मारेर बिहान ८ बजे बोलाएको छ भने दिउँसो २ बजे आएर सुट स्टार्ट भएको पनि यहीँ देखेँ ।’
एउटा सिन खिचेपछि सेटबाट गायब हुने र एडीहरुले खोज्नुपर्ने, निर्माताको गाडी भित्तामा ठोकेर ध्वस्त बनाएको, पहिरन मन परेन भन्दै डिजाइनर नै परिवर्तन गरेको जस्ता आरोप शान्तिले लगाएकी छन् । उनको स्टाटसलाई निर्देशक गुरुङले पनि सेअर गरेर समर्थन जनाएका छन् । उनले दोलालघाटमा पूजा गरेर फर्किँदा हिलाम्मे भएको आफ्नो गाडीको तस्वीर समेत पोस्ट गरेका छन् ।
