अघिल्लो वर्ष फिल्म ‘झिँगेदाउ’ हिट भएपछि अभिनेत्री आँचल शर्मा प्रफुलित थिइन् । चार वर्षपछि उनले हिट फिल्म पाएकी थिइन् । तर, उनलाई ‘झिँगेदाउ’ले दिएको खुसीमा यस वर्षको बैशाखमा आएको फिल्म ‘नाईं नभन्नू ल ६’ले पानी फेरिदियो । यो फिल्म उनको करिअरकै सबैभन्दा ठूलो ‘फ्लप’ बन्न पुग्यो, जसको उनलाई अपेक्षा नै थिएन । किनकि, ‘नाईं नभन्नू ल’ हिट सिरिज थियो ।

‘नाईं नभन्नू ल ६’ असफल भए पनि उनलाई फिल्मको खडेरी भने छैन । उनले केही महिनाअघि मुस्कान ढकालको निर्देशनमा बन्न लागेको फिल्म ‘पञ्चामृत’ सम्झौता गरेकी थिइन् । यसमा उनको जोडी अभिनेता धीरज मगरसँग बाँधिदैछ । यसबीच, उनले अर्को नयाँ फिल्म सम्झौता गरेकी छन् । सविनकुमार तोलाङ्गीको निर्देशनमा बन्न लागेको फिल्म ‘ह्वाइट हाउस’मा उनी जोडिएकी छन् ।

यो फिल्मभन्दा अघि आँचलले ‘पञ्चामृत’को छायांकन भ्याउने जनाइएको छ । ‘ह्वाइट हाउस’को भने तिहारपछि छायांकन सुरु गर्ने योजनामा निर्माण टिम छ । तोलाङ्गीकै लेखन रहेको फिल्ममा रमेश उप्रेती र गरिमा शर्मा पनि अनुबन्ध भैसकेको चर्चा छ । यद्यपि, यसबारेमा आधिकारिक पुष्टि भएको छैन । सविनले यसअघि केही सर्ट फिल्म तथा म्यूजिक भिडियोको निर्देशन गरिसकेका छन् ।