बलिउड सुपरस्टार शाहरुख खान अभिनीत फिल्म ‘जवान’को प्रदर्शनको एक हप्ताअघि ट्रेलर सार्वजनिक गरिएको छ । शाहरुखले बिहीबार दुबईबाट सार्वजनिक गरेको ट्रेलर ‘एक्सन प्याक्ड’ छ । भीएफएक्स र ब्याकग्राउन्ड म्यूजिक जबर्जस्त देखिन्छ । एक्सन अवतारमा प्रस्तुत भएका शाहरुखको दुई रुप देखाइएको छ । एउटामा उनी प्रहरी र अर्कोमा नकारात्मक भूमिकामा चित्रित छन् ।
सारुकको भिडन्त भिलेन विजय सेतुपतिसँग हुने ट्रेलरले संकेत गर्छ । प्रहरीको भूमिकामा साउथ अभिनेत्री नयनतारा प्रस्तुत छन् । दीपिका पादुकोण अतिथि भूमिकामा रहेको फिल्ममा सान्या मल्होत्रा, प्रियामणि, अश्लेशा ठाकुर, लहर खान, रिद्धि डोगरा, संजीता भट्टाचार्या, गिरिजा ओक गोडबोले, योगी बाबुको पनि अभिनय छ । हिन्दीसहित तमिल र तेलुगू भाषामा पनि फिल्म रिलिज हुँदैछ ।
शाहरुख स्वयंको प्रोडक्सन कम्पनी रेड चिल्लीले निर्माण गरेको फिल्मका निर्देशक एट्ली कुमार हुन् । उनी साउथ इन्डष्ट्रीका नामी निर्देशक हुन् । उनले साउथ सुपरस्टार विजय थलपथिलाई लिएर ‘थलपथि ६३’, ‘मेर्सल’, ‘थेरी’ जस्ता सुपरहिट फिल्म बनाइसकेका छन् । ‘जवान’ उनको पहिलो बलिउड फिल्म हो । यो फिल्मले भारतीय बजारमा मात्रै ५ सय करोड कमाउने प्रक्षेपण गरिएको छ ।
