भदौ २९ गतेबाट प्रदर्शनमा आउन लागेको झरना थापाद्वारा निर्देशित फिल्म ‘एक भगवत् गीता’को दोस्रो गीत सार्वजनिक गरिएको छ । बुधबार श्रीकृष्ण जन्माष्टमीको अवसर पारेर युट्युबमा सार्वजनिक गरिएको ‘के तिमीलाई यो कुराको खबर छ’ बोलको गीतमा हर्कुसल बस्नेत, राजाज्ञा श्रेष्ठ र सुमन गुरुङको स्वर रहेको छ भने सविन एकतारेको शब्द रचना तथा हर्कुसल स्वयंको संगीत छ ।
मैथिली भाषाको पनि प्रयोग भएको गीतमा फिल्मकी मुख्य अभिनेत्री सुहाना थापा र बाल कलाकार जेभिन श्रेष्ठ प्रस्तुत छन् । दिदी-भाईको रुपमा चित्रित उनीहरुको एकअर्काप्रति प्रेम, सामीप्यता र आत्मीयतालाई गीतमा दर्शाइएको छ । कविराज गहतराजको कोरियोग्राफी रहेको गीतको छायांकन जनकपुरधामस्थित प्रसिद्ध जानकी मन्दिर, रेलवे स्टेशनलगायतका ठाउँहरुमा गरिएको छ ।
फिल्ममा सुहाना र जेभिनका साथै विपिन कार्की, धीरज मगर, जेभिस श्रेष्ठ, संजोग रसाइली, मुकेश झा, राम कैलाश ठाकुर, धीरज ठाकुर, सुरेन्द्र राय, गंगाकान्त झाको पनि अभिनय रहेको छ । फिल्मको कन्सेप्ट सुहाना थापा र कथा झरना थापाको हो । फिल्ममा झरनासँगै सरिन पोखरेल, परिक्षेद सेन, पुरुषोत्तम ढंगेल र कृष्णको पटकथा तथा परिक्षेद, पुरुषोत्तम र सरिनको संवाद लेखन छ ।
राजेश श्रेष्ठको छायांकन, मित्र डि गुरुङको सम्पादन, हिमाल केसीको द्वन्द्व निर्देशन तथा शैलेश श्रेष्ठको ब्याकग्राउण्ड स्कोर रहेको फिल्मको प्रस्तुतकर्ता सुनिल कुमार थापा र निर्माता सुहाना थापा हुन् । फिल्ममा विपिन ‘ट्रान्सजेन्डर’को भूमिकामा प्रस्तुत छन् । उनको लुक्सले फिल्मलाई नै चर्चामा ल्याएको छ । फिल्मले यौनिक तथा लैंगिक अल्पसंख्यक समुदायको कथालाई उठाएको छ ।
