‘जुलेबी’, ‘गाँजाबाजा’, ‘होस्टेल रिर्टन्स’, ‘रणवीर’ जस्ता फिल्ममा अभिनयको वाहवाही बटुलेका अभिनेता सुशील सिटौला नयाँ फिल्म ‘मायावी’मा अनुबन्धित भएका छन् । निर्माण टिमले आइतबार एक पोस्टरमार्फत् फिल्ममा उनको अभिनय रहने जानकारी गराएको हो । यसअघि फिल्ममा अभिनेता पल शाह अनुबन्ध भैसकेका छन् । फिल्ममा अभिनेत्री दीपिका प्रसाईंको पनि अभिनय रहनेछ ।

दीवाकर भट्टराईको लेखन तथा निर्देशनमा बन्न लागेको फिल्मको आगामी असोज पहिलो साताबाट पोखरामा छायांकन सुरु हुनेछ । पोखराकै परिवेशमा रहेर फिल्मको कथा बुनिएको निर्देशक भट्टराईले जानकारी गाएका छन् । क्रिएटिभ सिने आर्टसले ब्यानरमा निर्माण हुन लागेको ‘मायावी’मा एसडी योगीको संगीत, राम अविरल विष्टको गीत रचना तथा राजुविक्रम थापाको डिओपी रहनेछ ।

एक घटनाका कारण एक वर्ष जेल जीवन विताएपछि पल शाहले ‘मायावी’बाट फिल्म अभिनयमा कमब्याक गर्न लागेका हुन् । चार हप्तासम्म रंगकर्मी तथा निर्देशक अनुप बरालबाट अभिनय सिकेका उनले अहिले फिल्मको वर्कसप गरिरहेका छन् । यो फिल्मको छायांकनपछि उनले पुनः बरालबाट अभिनय सिक्ने जानकारी प्राप्त छ । निर्देशक भट्टराईसँग उनको पहिलो पटक सहकार्य हो ।