फिल्म क्षेत्रमा कलाकारको ‘लभ लाइफ’को चर्चा बढी हुने गर्छ । त्यसमाथि अभिनेता आकाश श्रेष्ठको त अलि बढी नै हुन्छ । फिल्म ‘रामकहानी’पछि उनको नाम अभिनेत्री पूजा शर्मासँग जोडियो । जहाँ जाँदा पनि एकसाथ हुनु, फिल्म र म्यूजिक भिडियोमा जोडी नटुट्नु, एकअर्काको तारिफमा नथाक्नु उनीहरुबीच प्रेम प्रमाणित गर्ने आधार थिए । भलै दुवैले कहिल्यै पनि प्रेम स्वीकार गरेनन् ।
यतिबेला यो जोडी व्यक्तिगत र व्यावसायिक जीवनबाट पूर्ण रुपमा अलग भैसकेका छन् । पूजापछि आकाशको नाम अभिनेत्री तथा मोडल करुणा श्रेष्ठसँग जोडिँदै आएको अवस्था छ । उनीहरुले एकसाथ म्यूजिक भिडियोमा निरन्तर सहकार्य गरिरहनुले पनि प्रेम सम्बन्धको चर्चामा ठूलो बल मिलेको छ । यद्यपि, दुवैले आफूहरु मिल्ने साथी मात्र रहेको रेडिमेड जवाफ दिन भने छाडेका छैनन् ।
बुधबार करुणाको जन्मदिनको अवसरमा आकाशले सामाजिक सञ्जालमा व्यक्त गरेका शब्दले पनि उनीहरुबीच गहिरो प्रेम रहेको संकेत गर्छ । आमाबाहेक हत्तपत्त कसैलाई सामाजिक सञ्जालमार्फत् जन्मदिनको शभुकामना नदिने उनले करुणालाई भने विशेष महत्त्व दिएका छन् । करुणासँगको एउटा तस्वीर इन्स्टाग्राममा सेअर गर्दै आकाशले संसारकै सबैभन्दा सुन्दर व्यक्ति भनेका छन् ।
उनले लेखेका छन्, ‘संसारकै सबैभन्दा सुन्दर व्यक्तिलाई जन्मदिनको शुभकामना । भगवानले तिमीलाई अनगिन्ती आशिर्वाद प्रदान गरून् ।’ उनले व्यक्त गरेका शब्दका लागि करुणाले कमेन्टमा धन्यवाद दिँदै लभ इमोजी राखेर ‘यी कुराको धेरै कदर गर्नेछु’ भनेर उल्लेख गरेकी छन् । आकाश र करुणाको बारेमा सम्भवतः आगामी दशैंपछि केही नयाँ खबर आउन सक्ने चर्चा फिल्मवृतमा छ ।
