अन्तर्राष्ट्रिय नेपाली कलाकार समाज (इनास) अमेरिकाको अध्यक्षमा अभिनेता राहुल केसी निर्वाचित भएका छन् । सन् २०२१ देखि २०२३ सम्म महासचिव रहेका उनी अब अध्यक्षको जिम्मेवारीमा आएका हुन् । आइतबार अमेरिकाको मेरिल्यान्डमा सम्पन्न राष्ट्रिय अधिवेशनबाट आगामी दुई वर्षका लागि अध्यक्षसहित १३ जनाको कार्यसमिति निर्वाचित भएको हो ।
वरिष्ठ उपाध्यक्षमा सृजन ताम्राकार, दुई उपाध्यक्षमा रिता श्रेष्ठ र अङ्कुश नेपाल, महासचिवमा प्रकाश नेपाल, कोषाध्यक्षमा दिनेश कार्की र सह-कोषाध्यक्षमा मनिष शर्मा निर्वाचित भए । यसै गरी कार्यसमिति सदस्यमा तथा प्रवक्तामा गोपालचन्द्र लामिछाने, सदस्यहरूमा अनिल तिमल्सेना, अरुणा कार्की, गोपाल अधिकारी, अमिता लामा र विश्व पौडेल निर्वाचित भएका छन् ।
यसैगरी विभिन्न राज्य समितिमा पदाधिकारी तथा सदस्य निर्वाचित भएका छन् । अमेरिकाको केन्टकी राज्य समिति अध्यक्षमा गोपाल नेपाल ‘फिस्टे’, मेरिल्यान्ड राज्य समिति अध्यक्षमा लक्ष्मण पौडेल र भर्जिनिया राज्य समिति अध्यक्षमा अर्जुन घिमिरे निर्वाचित भएका छन् ।
इनास ग्लोबलकी उपाध्यक्ष सबु गदाल कार्की तथा मेरिल्यान्डका नेपाली मूलका विधान सभा सदस्य डा. ह्यारी भण्डारीले पानसमा बत्ति बालेर राष्ट्रिय अधिवेशन सुरु गरेका थिए । अधिवेशनमा पत्रकार तथा निर्देशक प्रकाश सुवेदी, गायक तुलसी पराजुली, नायक रमेश उप्रेती तथा गायिका प्रविशा अधिकारीलाई विशेष सम्मान गरिएको थियो । इनास अमेरिकाको निवर्तमान अध्यक्ष कन्हैया सिंह परियार हुन् ।
