बलिउडका ‘दबंग स्टार’ सलमान खान अभिनीत फिल्म ‘टाइगर ३’को टिजर सार्वजनिक गरिएको छ । ‘टाइगरको म्यासेज’ भनेर सार्वजनिक गरिएको टिजर एक्सन प्याक्ड छ । १ मिनेट ४६ सेकेण्ड लम्बाईको टिजरमा सलमान एक्सन अवतारमा प्रस्तुत छन् । टिजरको सुरुवातमा टाइगर पात्रको ‘कन्फेसन’ छ, जहाँ उसले आफू भारतको दुश्मन र एक नम्बर गद्दार रहेको दाबी गरेको छ ।
टाइगर पात्र भन्छ, ‘मेरो नाम अविनाश सिंह राठौड हो । तर, तपाईंहरुका लागि म टाइगर हुँ । २० वर्ष सबैथोक भारतको सुरक्षामा लगाएँ । बदलामा केही मागिनँ । आज माग्दैछु । आज यो बताइँदैछ कि टाइगर दुश्मन हो । एक नम्बरको गद्दार हो । २० वर्षपछि इन्डियासँग आफ्नो क्यारेक्टर सर्टिफिकेट माग्दैछु । मेरो छोरालाई मैले होइन भारतले भन्नेछ, उसको पिता गद्दार हो या देशभक्त ।’
मनिष शर्माद्वारा निर्देशित फिल्ममा सलमासँगै कटरीना कैफको मुख्य भूमिका छ । यसका अघिल्ला दुई श्रृंखलामा पनि उनीहरु नै थिए । फिल्ममा इमरान हाशमी भिलेनको भूमिकामा छन् । तर, टिजरमा सलमानबाहेकको कलाकारलाई राखिएको छैन । ‘टाइगर ३’मा शाहरुख खान र ऋतिक रोशनको केमियो भूमिका रहेको जनाइएको छ । २०२३ को दीपावलीमा फिल्म प्रदर्शनमा आउँदैछ ।
