बलिउड सुपरस्टार टाइगर श्राफ अभिनीत फिल्म ‘गणपत’को ‘एक्सन-प्याक्ड’ टिजर सार्वजनिक गरिएको छ । ‘भिजुअल इफेक्टस’ जबर्जस्त रहेको १ मिनेट ४५ सेकेण्डको टिजरमा टाइगर एक्सन गर्दै प्रस्तुत छन् । एक्सनमा योगा र मार्शल आर्ट्सको ‘फर्म’ प्रयोग गरिएको छ । टिजरमा हाईटेक विल्डिङ, मार्वल्स युनिभर्सको फिल्ममा जस्तै हाईटेक प्लेन र रोबोटवाला बाघ पनि देख्न सकिन्छ ।
टिजरमा अभिनेता अमिताभ बच्चनको लुक्स रोचक छ । उनको एउटा आँखा पट्टीले बाँधिएको छ र त्यसमाथि चश्मा लगाइएको छ । उनको ‘भ्वाइस ओभर’ उस्तै सशक्त छ । फिल्ममा टाइगरको जोडी अभिनेत्री कृति सेननसँग बाँधिएको छ । टिजरमा कृति पनि एक्सन अवतारमा प्रस्तुत छिन् । विकास बहल निर्देशित ‘गणपत’ हिन्दी, तमिल, तेलुगु, मलयालम र कन्नड भाषामा प्रदर्शन हुँदैछ ।
यो फिल्म आगामी अक्टोबर २० (कात्तिक ३ गते)बाट प्रदर्शनमा आउँदैछ । नेपालमा यसको भिडन्त कात्तिक ४ गतेदेखि प्रदर्शनमा आउन लागेको अभिनेता विपिन कार्की स्टारर फिल्म ‘पशुपति प्रसाद २ : भष्मे डन’सँग हुनेछ । दुवै ठूला फिल्म भएकाले प्रतिस्पर्धा रोचक हुने देखिन्छ । तर, जनराको हिसाबले यी दुवै अलग छन् । यसैले दर्शकलाई आफ्नो रुचिअनुसारको फिल्म छान्न सहज छ ।
