फिल्म ‘रावायण’लाई लिएर उत्पन्न विवाद उत्कर्षमा छ । अभिनेता अनमोल केसीले फिल्ममा काम गर्ने भनेर १० लाख पेश्की रकम लिएको तर पछि काम गर्न नमानेको भन्दै निर्माताले प्रहरीमा उजुरी दिएपछि उनी शुक्रबार पक्राउ परे । र, आइतबार साँझ हाजिरी जमानीमा उनी रिहा भए । प्रहरीले सोधपुछ गर्दा उनले स्क्रिप्ट मन नपरेकाले फिल्ममा काम गर्न अस्वीकार गरेको बताएका थिए ।
अनमोलले स्क्रिप्टमा दोष देखाएपछि ‘रावायण’का लेखक शिवम् अधिकारीले उनीविरुद्ध कानुनी कारबाहीमा जाने चेतावनी दिएका छन् । उनले फेसबुकमा स्टाटस लेख्दै अनमोलले ४ महिनादेखि यही स्क्रिप्टमा आफूलाई तयार गरेको र हरेक क्षण उत्कृष्ट लागेको स्क्रिप्ट अचानक कसरी ‘झुर’ लाग्यो भनेर प्रश्न गरेका छन् । अनमोलले कारबाहीबाट बच्न आफ्नो मानहानी गरेको उनको दाबी छ ।
उनी फिल्मीखबरसँगको कुराकानीमा भन्छन्, ‘सुदर्शन थापा र अनमोलको जुधाईमा मेरो सिर्जना किन बीचमा ल्याउनुपर्यो ? अनि, अनमोल ‘वान लाइन स्टोरी’ सुनेर फिल्म गर्न तयार भएको होइन । फाइनल स्क्रिप्ट मैले उसलाई इमेलमा पठाएको प्रमाण छ । म अनमोलसँग एकपटक बुझ्छु । उसले स्क्रिप्ट झुर भएरै काम नगरेको भन्ने जवाफ दिए कानुनी कारबाहीको प्रक्रियामा अघि बढ्छु ।’
स्क्रिप्ट सुनाएको पहिलो दिन नै अनमोलले ‘बबाल’ भनेको शिवम् स्मरण गर्छन् । अहिले स्क्रिप्टमाथि प्रश्न उठाउँदा आफ्नो मानहानी भएको उनले बताए । ‘आफू कानुनबाट बच्न अरुलाई खराब देखाउन मिल्छ ? अरुलाई हिलो छ्यापेर आफू चाहिँ सफा बन्ने ? यो त बदमासी हो । यसविषयमा म एकपटक उसैसँग सोध्छु । यदि हो नै रहेछ भने म ऊविरुद्ध मानहानीको उजुरी हाल्छु,’ उनले भने ।
यो विषयमा एउटा नजीर बस्न जरुरी रहेको उनको तर्क छ । धेरै कलाकारले फिल्ममा केही कुरा नमिलेपछि स्क्रिप्ट चित्त बुझेन भन्ने प्रवृत्ति रहेको र यसले लेखकको करिअरमै असर पर्ने उनी बताउँछन् । स्क्रिप्ट चित्त बुझेन भनेर व्यक्तिलाई भन्नु र मिडियालाई भन्नु फरक कुरा रहेको उनको बुझाई छ । ‘पञ्चायत’को निर्देशक समेत रहेका उनले दुई दर्जन बढी फिल्मको स्क्रिप्ट लेखिसकेका छन् ।
