‘कबड्डी’ र ‘दुई नम्बरी’को हिट जोडी दयाहाङ राई र सौगात मल्लले एकसाथ अभिनय गरेको नयाँ फिल्म ‘हात्तीछाप’ आगामी माघ २६ गतेबाट प्रदर्शनमा आउने तयारीमा छ । उनीहरुबीचको सहकार्यकै कारण फिल्म व्यवसायिक रुपमा सफल हुने आधार बलियो छ । अघिल्लो महिना सार्वजनिक गरिएको सौगातको ‘बोतल राजा’ अवतारले फिल्मप्रति नै दर्शकमा कौतुहलता सृजना गरेको छ ।
यसबीच, फिल्मका मुख्य कलाकारहरुलाई समेटेर निर्माण टिमले दुईवटा पोस्टर सार्वजनिक गरेको छ । जसमध्ये एउटामा सौगात बन्दुकलाई काँधमा राखेर घोडामाथि सवार छन् । दयाहाङ भने काखमा पाडो बोकेर खुसी भावमा देखिएका छन् । उनको साथमा अभिनेत्री उपासना सिंह ठकुरी घाँसको मुठा काखी च्यापेर प्रस्तुत छन् । यसले उनीहरु दाम्पतीको भूमिकामा रहेको संकेत गर्छ ।
त्यस्तै, ग्रामीण भूगोललाई पृष्ठभूमिमा राखेर तयार पारिएको दोस्रो पोस्टरमा सौगात, दयाहाङ र उपासनाको साथमा वेनिशा हमाल, विजय बराल, बुद्दि तामाङ र विल्सन विक्रम राई पनि फिचर्ड छन् । पोस्टरमा ध्यान खिच्ने भनेको चाहिँ सौगातको लुक्स र गेटअपले हो । उनको चरित्र रिसाहा र सन्काहा हुनसक्ने आँकलन गर्न सकिन्छ । फिल्मले ग्रामीण जीवनको कथा बोल्ने पोस्टरबाट बुझिन्छ ।
सिमोस सुनुवारद्वारा निर्देशित ‘हात्तीछाप’मा कमलमणी नेपाल, पुष्कर गुरुङ, प्रकाश घिमिरे, भोलाराज सापकोटा, बिनोद न्यौपाने, सुष्मा निरौला आदिको पनि अभिनय छ । प्रदीप भारद्वाजको लेखन, सुशन प्रजापतिको छायांकन र निमेष श्रेष्ठको सम्पादन रहेको फिल्मका प्रस्तुतकर्ता किरण नेपाली हुन् । पुष्कर गुरुङ र अमलादेवी राई निर्मातामा छन् । कार्यकारी निर्माता सरोज नेपाली हुन् ।
