बडा दशंको छेको पारेर यही असोज २६ गतेबाट प्रदर्शनमा आउन लागेको फिल्म ‘परदेशी २’को नयाँ गीत सार्वजनिक गरिएको छ । ‘कुरा सीधा छ’ बोलको डान्सिङ शैलीको गीतमा प्रताप दास र मीना निरौलाको स्वर छ भने बि.बि अनुरागीको शब्द रचना तथा संगीत छ । गोविन्द राईको कोरियोग्राफी रहेको गीतमा फिल्मका अभिनेता प्रकाश सपूत र अभिनेत्री वर्षा सिवाकोटी प्रस्तुत छन् ।
नारायण रायमाझी निर्देशित फिल्ममा प्रकाश र वर्षाको साथमा केकी अधिकारी, प्रशान्त तामाङ, दीलिप रायमाझी, नीर शाह, रमा थपलिया, देबेन्द्र बब्लु, सबिन बास्तोला, रोशनी कार्की लगायतको पनि अभिनय छ । युवापुस्ताको विदेश मोहको कथालाई उठान गरेको फिल्ममा गीतकार रमेश बिजीको लेखन छ । निर्देशक रायमाझी र राजेश वंशलले संयुक्त रुपमा फिल्म निर्माण गरेका हुन् ।
मानकृष्ण महर्जनको छायांकन, अष्ट महर्जनको द्वन्द्व निर्देशन, गोविन्द राईसँगै रामजी लामिछानेको कोरियोग्राफी रहेको फिल्मलाई दीर्घ खड्काले सम्पादन गरेका हुन् । ‘गोर्खा पल्टन’ र ‘परदेशी’ गरी दुई सुपरहिट फिल्म दिइसकेका निर्देशक रायमाझी ‘परदेशी २’बाट सफलतामा ह्याट्रिक गर्ने दाउमा छन् । यो फिल्मबाट गायनमा स्थापित प्रकाश सपूतले अभिनेताको रुपमा डेब्यू गरेका हुन् ।
