दशैंको छेको पारेर यही असोज २६ गतेबाट प्रदर्शनमा आउन लागेको कुमार भाष्करद्वारा निर्देशित फिल्म ‘कौसीद’को पहिलो गीत सार्वजनिक गरिएको छ । बुधबार सार्वजनिक ‘नझर्थेर आँशु’ बोलको मार्मिक भावको गीतमा स्वर तथा संगीत बुद्ध लामाको छ भने शब्द रचना लक्ष्मण बानियाँको हो । गीतले आफ्नो पीडा भुलेर अरूको खुसीको लागि संघर्षरत एक शिक्षकको कथा व्यक्त गर्छ ।
फिल्ममा अभिनेता भोलाराज सापकोटा र अभिनेत्री ऋचा शर्माको मुख्य भूमिका छ । उनीहरु दाम्पतीको भूमिकामा छन् । ऋणको चपेटामा परेको एक दाम्पतीको कथामा आधारित भएर बनेको ‘कौसीद’मा रुपेश दाहाल, परिक्षित विक्रम राणा, सदिक्षा गौतम, सन्दीप लोहनी, निर्भिक भट्टराईको पनि अभिनय छ । नवविजय प्रकाश श्रेष्ठ र धिर्जन थपलियाको फिल्ममा कथा लेखन रहेको छ ।
केदार भुसालको निर्माण रहेको फिल्मको कार्यकारी निर्मातामा दिमेश श्रेष्ठ र सह-निर्मातामा लक्ष्मण बानियाँ छन् । निसाल पौडेलले छायांकन गरेको फिल्ममा भिम विश्वकर्माको सम्पादन छ । बड पिक्चर्सको ब्यानरमा तयार भएको फिल्मलाई आरआर फिल्म्सले वितरण अधिकार लिएको छ । फिल्मको टिमले युट्युबमा गीत र ट्रेलर सार्वजनिक गर्नुबाहेक प्रचारमा उत्तिधेरै ध्यान दिएको छैन ।
