‘बुलबुल’ होस् या ‘चिसो मान्छे’, जसमा अभिनेत्री स्वस्तिमा खड्काले निर्वाह गरेको चरित्रमा ठूलो विविधता भेटिन्छ । र, उनले चरित्र निर्माणमा गरेको मिहिनेत देखिन्छ । यसैले त उनले ‘भर्सटायल अभिनेत्री’को पहिचान बनाएकी छन् । जुनसुकै चरित्रमा चुनौती लिन सक्ने उनी एकपटक फेरि फिल्म ‘पशुपति प्रसाद २ : भष्मे डन’मा भिन्न चरित्रमा देखिँदैछिन् । यसमा उनी दुर्गा माता बनेकी छन् ।
संयोग चाहिँ के जुरेको छ भने यो फिल्म दशैं अर्थात् फूलपाती (कात्तिक ४ गते)बाट प्रदर्शनमा आउँदैछ । दशैंमा दुर्गा माताकै पूजा गरिन्छ । र, फिल्ममा स्वस्तिमा दुर्गा बनेकी छन् । उनी आफ्नो लागि यो रोचक अनुभूति मान्छिन् । छायांकनको बेला पशुपतिनाथ दर्शन गर्न आएका धेरै भारतीयहरुले ‘माता’ भन्दै उनको खुट्टामा पैसा समेत चढाएका थिए । जुन उनका लागि नयाँ अनुभव थियो ।
सोमबार ट्रेलर सार्वजनिक कार्यक्रममा उनले भनिन्, ‘दशैंमा म दुर्गा बनेर आउँदै रहेछु । मेरो लागि यो आफैंमा सुखद् अनुभूति हो । र, यो चरित्र गर्नु मेरो लागि नयाँ अनुभव थियो । छायांकनको बेला जब म दुर्गाको गेटअपमा हुन्थेँ, त्यसबेला पशुपतिनाथको दर्शन गर्न आउने भारतीयहरुले ‘माता’ भन्दै खुट्टा ढोग्न आउनुहुन्थ्यो । र, पैसा चढाउनुहुन्थ्यो । मेरो लागि यो एकदमै नयाँ अनुभव थियो ।’
अभिनेत्रीका लागि भनेर ‘एक्सपेरिमेन्ट’ खालको रोल कम लेखिने उनको बुझाई छ । उनी भन्छिन्, ‘विशेषगरी हामी अभिनेत्रीहरुका लागि ‘एक्सपेरिमेन्ट’ गरेर वा फरक आयामबाट एकदमै कम रोलहरु लेखिन्छ । मलाई के लाग्छ भने कलाकारभन्दा पनि लेखनमा ‘भर्सटालिटी’ हुनुपर्छ ।’ आफूले ‘एक्सपेरिमेन्ट’वाला रोल दीपेन्द्र के. खनाल (निर्देशक)सँग गर्न पाएकोमा उनी खुसी व्यक्त गर्छिन् ।
‘मैले एक्सपेरिमेन्ट खालको रोल निर्देशकमा दीपेन्द्र दाईसँग गरेको छु । ‘भष्मे डन’मा मैले दुर्गा माताको क्यारेक्टर निर्वाह गरेको छु । यो क्यारेक्टर मेरो लागि चुनौतीपूर्ण नै थियो । फिल्म हेरिसकेपछि कति न्याय गरेछु भन्ने निर्कौल होला । तर, मैले यो क्यारेक्टरमा जति गर्न सकेँ, त्यसको क्रेडिट निर्देशकलाई जान्छ,’ उनले भनिन् । उनी यो फिल्म आफ्नो लागि एकदमै विशेष रहेको बताउँछिन् ।
