हाँस्य चरित्रमा निकै रुचाइएका अभिनेता हुन्, टीकू तलसानिया । रंगमञ्च हुँदै फिल्मसम्मको यात्रा तय गरेका उनले २५० भन्दा बढी फिल्ममा काम गरिसकेका छन् । सन् १९८६ मा आएको फिल्म ‘प्यार के दो पल’बाट बलिउडमा उनले ब्रेक पाएका थिए । १९९३ मा आएको फिल्म ‘वक्त हमारा है’मा कमेडी भूमिकाबाट हटेर गम्भीर चरित्र निर्वाह गरेका उनीसँग अहिले भने एउटै फिल्म छैन ।
कुनै बेला एउटै सेड्युलमा ३/४ वटासम्म फिल्मको छायांकन गरेका उनले यतिबेला अडिसन दिँदा समेत काम पाउन सकेका छैनन् । उनले एक अन्तर्वार्तामा भनेका छन्, ‘म दिनहुँजसो कामको खोजीमा निस्कन्छु । निकै धेरै अडिसन पनि दिइरहेको छु । तर, मैले त्यो हिसाबको काम पाउन सकिरहेको छैन ।’ टीकूले केही वर्षयता बलिउड इन्डस्ट्रीमा धेरै परिवर्तन आएको महसुस गरेका छन् ।
‘त्यो समय गयो जब दुईवटा डान्स, दुईवटा रोमान्टिक गीत राखेर फुर्मला फिल्म बन्ने गर्थे र कमेडियन आएर आफ्नो काम गर्थे । यो सबै अब बदलिसकेको छ । अब फिल्म कथाको आधारमा बनिरहेका छन् र कथालाई प्राथमिकता दिन थालिएको छ । यसैले अब कि तपाईंको चरित्र फिल्मको कथाको हिस्सा हुन सक्नुपर्यो या तपाईंको व्यक्तित्व कुनै चरित्रसँग मिल्नु पर्यो,’ टीकूले भनेका छन् ।
उनले आफूले फिल्ममा लगातार कामको खोजी गरिरहेको बताएका छन् । यद्यपि, आफूले धैर्यता नगुमाएको उनको भनाई छ । ‘म लगातार काम खोजिरहेको छु । समयसँगै हरेक चीज बदलिन्छन् । तर, धैर्यता राख्न सक्नुपर्छ । म मेकरहरुको फोनको प्रतिक्षामा छु,’ उनले अगाडि भनेका छन्, ‘यदि मलाई कुनै सुहाउने रोल भए काम गर्न तयार छु । मेरो लागि काम खोज्न कठीन भैरहेको छ ।’
