गत वर्ष प्रदर्शनमा आएको फिल्म ‘प्रेमगञ्ज’ले बक्स अफिसमा पैसा नकमाए पनि तारिफ कमाएको थियो । यही फिल्मबाट निर्देशक बनेका परिच्छेद सेनले निर्देशनमा राम्रो सम्भावना देखाएका थिए । उनको कथावाचन शैलीको प्रशंसा भएको थियो । अब उनले ‘महाराजधिराज’ शीर्षकमा नयाँ फिल्म बनाउने भएका छन् । घटस्थापनाको अवसर पारेर फिल्मको निर्माण घोषणा गरिएको छ ।
यो फिल्ममा सेनको निर्देशनसँगै लेखन पनि रहनेछ । छत्रेश्वरी म्यानेजमेन्टको ब्यानरमा बन्न लागेको फिल्मको प्रस्तुतकर्तामा विराज विष्ट र निर्मातामा टोपेन्द्र विष्ट रहेका छन् । यसअघि उनीहरुले फिल्म ‘बुलाकी’ निर्माण गरेका थिए, जसले चलचित्र विकास बोर्डले राष्ट्रपति कार्यालयमा आयोजना गरेको ‘राष्ट्रिय चलचित्र पुरस्कार २०८०’मा ‘विशेष फिल्म’को अवार्ड प्राप्त गर्न सफल भएको थियो ।
फिल्मको निर्माण घोषणासँगै आगामी वर्षको तिहारलाई प्रदर्शन पनि निश्चित गरिएको छ । फिल्मले रोमान्टिक तथा सामाजिक कथा प्रस्तुत गर्ने निर्देशक सेनले जानकारी दिए । फिल्मका लागि कलाकारहरु भने तय भैसकेका छैनन् । निर्देशक सेनले ‘प्रेमगञ्ज’बाट आफूप्रति दर्शकले गरेको विश्वास र भरोसालाई डगमगाउन नदिने बताउँदै ‘महाराजधिराज’लाई सशक्त बनाउने दाबी गरेका छन् ।
