उदय सुब्बाको निर्देशनमा बनेको फिल्म ‘दुई कदम’को प्रेम र द्वन्द्व मिश्रित टिजर सार्वजनिक गरिएको छ । घटस्थापनाको अवसर पारेर आइतबार सार्वजनिक गरिएको टिजरमा डेब्यू अभिनेता इओन लिम्बु र डेब्यू अभिनेत्री सिमोन गिरीबीचको प्रेममा आउने उतार-चढावलाई प्रस्तुत गरिएको छ । प्रेममा परिवार बाधक हुँदा उत्पन्न परिस्थितिमा फिल्म केन्द्रित रहेको टिजरले संकेत गर्छ ।
आगामी मंसिर २९ गतेबाट प्रदर्शनमा आउने तयारीमा रहेको फिल्ममा इओन र सिमोनका साथै सुनिल थापा, गौरव पहारी, कविता आले, सुरवीर पन्डित, प्रेम सुब्बा, बुद्धि तामाङ, अर्जुन गुरुङ, विमला लिम्बु, जीवन लिम्बु, चन्दा दाहाल र प्रितिका शर्मालगायतको पनि अभिनय छ । सुनिल थापा नकारात्मक भूमिकामा छन् । फिल्मको एक गीतमा भने अभिनेता विल्सन विक्रम राईको नृत्य छ ।
अजम्बरी फिल्मस्को निर्माण रहेको फिल्ममा तारा देवी लिम्बुको लगानी छ । फिल्ममा दयाराम घिमिरेको कथा तथा पटकथा लेखन छ भने विक्रम डिसीको छायांकन, ताराप्रकाश लिम्बु र विकास चौधरीको संगीत, डिपी खनालको गीत रचना, राजु किराँतीको द्वन्द्व, रामजी लामिछानेको कोरियोग्राफी र प्रविन ढकालको सम्पादन रहेको छ । ‘दुई कदम’ उत्कृष्ट बनेको निर्देशक सुब्बाको दाबी छ ।
