बलिउड सुपरस्टार सलमान खान स्टारर फिल्म ‘टाइगर ३’को ट्रेलर सार्वजनिक गरिएको छ । सोमबार निर्माण कम्पनी यशराजको युट्युब च्यानलबाट सार्वजनिक २ मिनेट ५१ सेकेण्ड लम्बाईको ट्रेलरमा सलमान ‘हाइलाइट’ छन् । ‘टाइगर’को अघिल्लो श्रृंखलामा देशका लागि लडेको टाइगर पात्र यसपटक परिवार बचाउन संघर्ष गरिरहेको देखिन्छ । ट्रेलरमा सलमानको एक्सन बढी हाबी छ ।

ट्रेलरमा कटरीना कैफले पनि राम्रै ‘स्क्रिन स्पेश’ पाएकी छन् । उनको एक्सन शैली जबर्जस्त छ । यस्तै, इमरान हाशमी नकारात्मक भूमिकामा छन् । उनको लुक्स पृथक छ । ट्रेलरको अन्त्यतिर इमरानले सलमानलाई पाकिस्तानमा बन्धक बनाएको देख्न सकिन्छ । फिल्ममा अभिनेताद्वय शाहरुख खान र ऋतिक रोशनको केमियो भूमिका रहेको चर्चा छ । तर, ट्रेलरमा दुवैलाई देखाइएको छैन ।

‘एक था टाइगर’ आफ्नो समयको दमदार एक्सन फिल्ममध्ये एक थियो । यसको दोस्रो श्रृंखला ‘टाइगर जिन्दा हे’लाई पनि एक्सनमा एउटा मानक मानिन्छ । ‘टाइगर ३’मा भने एक्सनमा नयाँ प्रयोग गरिएको संकेत ट्रेलरले दिन्छ । लक्ष्मीपूजा (कात्तिक २६ गते)बाट प्रदर्शनमा आउन लागेको फिल्मले भारतमा ‘रेकर्डब्रेक’ कमाई गर्ने आँकलन गरिएको छ । यो फिल्मका निर्देशक मनिष शर्मा हुन् ।