बडा दशैंको मौका पारेर कात्तिक ४ गते (फूलपाती)बाट प्रदर्शनमा आउन लागेको दीपेन्द्र के. खनालद्वारा निर्देशित फिल्म ‘पशुपति प्रसाद २ : भष्मे डन’को टिमले सोमबार साँझ पशुपतिमा क्षमा पूजा गरेको छ । ६५ दिनसम्म फिल्मको छायांकन पशुपति क्षेत्रमा भएको थियो । त्यसक्रममा केही गल्ती-कमजोरी भएको हुनसक्ने भन्दै माफी माग्न सन्ध्याकालिन आरतीमा क्षमा पूजा गरिएको हो ।
पूजामा निर्देशक खनालका साथै लेखक तथा निर्माता खगेन्द्र लामिछाने, अभिनेत्री स्वस्तिमा खड्का, वितरक करण श्रेष्ठ र प्रोडक्सन म्यानेजर शंकर पाण्डे आदि सहभागी थिए । मान्छेबाट काम गर्ने क्रममा अन्जानमा कुनै गल्ती हुनसक्ने भएकाले यदि त्यसो भएको खण्डमा भविष्यमा कुनै खालको क्षति नहोस् भन्नका लागि पुशपतिमा हुने आरतीमा क्षमा पूजा गर्ने प्रचलन रहेको खगेन्द्रले बताए ।
स्वस्तिमाले आफूले फिल्मका लागि क्षमा पूजा गरेको पहिलो अनुभव रहेको बताइन् । कहिले काहीँ नयाँ अनुभव गर्नुको मज्जा बेग्लै हुने बताउँदै उनी भन्छिन्, ‘मैले आजसम्म धेरै फिल्ममा काम गरेको छु । धेरै मन्दिरमा छायांकन गरेकी छु । तर, क्षमा पूजा आफ्नो पहिलोपटक भएकाले पनि नौलो महसुस गरेकी हुँ ।’ स्वस्तिमा ‘गेरु रंग’को कुर्था-सुरुवालमा क्षमा पूजामा सहभागी भएकी थिइन् ।
यो फिल्ममा विपिन कार्की, सौगात मल्ल, रविन्द्र सिंह बानियाँ, माओत्से गुरुङ, प्रकास घिमिरे, लोकेन्द्र लेखक, मिस्श्री थापा, सजन थापा मगर, विभु पौडेललगायतको पनि अभिनय छ भने विशेष भूमिकामा खगेन्द्र लामिछाने र वर्षा सिवाकोटी छन् । नाम नै ब्रान्ड रहेको फिल्मले आक्रामक ओपनिङ गर्ने प्रक्षेपण गरिएको छ । फिल्मलाई २ करोडमाथिको ओपनिङ मिल्ने विश्लेषण धेरैको छ ।
