दशैंको फूलपाती (कात्तिक ४ गते)बाट प्रदर्शनमा आउन लागेको दीपेन्द्र के. खनालद्वारा निर्देशित फिल्म ‘पशुपति प्रसाद २ : भष्मे डन’को मार्मिक भावको गीत सार्वजनिक गरिएको छ । बिहीबार युट्युबमा सार्वजनिक ‘मेरो शिव’ बोलको गीतमा फिल्मका प्रमुख पात्रहरु विपिन कार्की, स्वस्तिमा खड्का र सौगात मल्ल भावुक मुद्रामा चित्रित छन् । यस गीतले उनीहरुको मनोभाव बोलेको छ ।
गीतमा किरण भुषालको संगीत र कृष्ण उदासीको शब्द रचना तथा शान्तिम कोइराला र र्यापर युनिक पोइटको स्वर छ । ‘पशुपति प्रसाद २’ले घरेलू बक्स अफिसमा आक्रामक ओपनिङ गर्ने देखिएको छ । मल्टीप्लेक्सहरुमा फिल्मलाई प्राप्त प्रायः शो राताम्मे छन् । केही शो ‘सोल्डआउट’ नै भइसकेका छन् । फिल्मप्रति दर्शकको क्रेज हेर्दा २ करोडमाथिको ओपनिङ गर्ने प्रक्षेपण गरिएको छ ।
फिल्ममा रविन्द्र सिंह बानियाँ, माओत्से गुरुङ, प्रकास घिमिरे, लोकेन्द्र लेखक, मिस्श्री थापा, सजन थापा मगर, विभु पौडेल, प्रकाश दाहाल लगायतको पनि अभिनय छ भने खगेन्द्र लामिछाने र वर्षा सिवाकोटी विशेष भूमिकामा छन् । टुकी आर्ट्सको निर्माण रहेको फिल्मका निर्माता तथा लेखक खगेन्द्र लामिछाने स्वयं हुन् । निरज कँडेलको डिओपी रहेको फिल्ममा कृष्ण थापाको छायांकन छ ।
पशुपति प्रसाद पात्रको मृत्युपश्चात् पशुपति क्षेत्रमा आफ्नो अस्तित्व स्थापित गर्न संघर्षरत भष्मे डन पात्रको जीवनमा एउटा रोमाञ्चक पात्रको प्रवेशपछि सुरु भएको परिचय र आत्मसम्मानका लागि गर्ने शक्ति संघर्षको कथामा फिल्म केन्द्रित छ । लेखक लामिछानेले अर्थपूर्ण सिक्वेल बनेको दाबी गरेका छन् । यो फिल्मलाई डिसिएन, टि फक्स र रिच इन्टरटेन्मेन्टले वितरणको जिम्मा लिएका छन् ।
