छायांकनको अन्तिम चरणमा रहेको फिल्म ‘रङ्गेली’को अमेरिका प्रदर्शन अधिकार बिक्री भएको छ । अमेरिकाको लागि फिल्मको वितरण अधिकार एक्का बास्सा इन्टरटेन्मेन्ट एन्ड लाइभ एट प्रिजेन्टले खरिद गरेको हो । फिल्मको प्रदर्शन अधिकार बिक्री भएसँगै क्यालिफोर्नियाको सान फ्रान्सिस्को र टेक्सासस्थित ड्यालसमा फिल्मको प्रिमियर पनि हुने निर्देशक अर्जुन सुवेदीले जानकारी दिए ।
यसअघि जापान, कोरिया र हङकङ गरि तीन देशको फिल्मको वितरण अधिकार उज्ज्वल गुरागाईँ र यूएनए इन्टरटेन्मेन्टले खरिद गरिसकेको छ । अस्ट्रेलियामा पनि फिल्मको प्रदर्शन अधिकार बिक्री भैसकेको छ । अस्ट्रेलियाको मेलबर्नमा माघको अन्तिम हप्ता फिल्मको प्रिमियरको समेत तयारी गरिएको छ । फिल्म भने महाशिवरात्रीको अवसर पारेर आगामी फागुन २५ गते रिलिज हुँदैछ ।
निर्देशक सुवेदीको लेखन रहेको ‘रङ्गेली’मा दयाहाङ राई, मिरुना मगर, अर्पण थापा, प्रवीण खतिवडा, रमेश बुढाथोकीलगायतको अभिनय छ । फिल्मको कार्यकारी निर्माता जीतेन्द्र खतिवडा र अनुज जङ्ग थापा हुन् । निर्मातामा संसार चौलागाईं र रमेश भट्टराई वशिष्ठ रहेका छन् भने युवक कार्की र शिव शङ्कर चौलागाईँ सह-निर्मातामा छन् । विवेक खड्का (योलो) एशोसियट निर्माता हुन् ।
फिल्मका गीतहरुमा हर्क साउदको शब्द रचना तथा सुशान्त गौतम र हर्कुलस बस्नेतको संगीत छ । फिल्मको एउटा गीत युरोपको प्रतिष्ठित ‘बुढापेस्ट अर्केस्ट्रा’मा लाइभ छायाङ्कन गरिँदैछ । नेपाली फिल्ममा पहिलोपटक यसरी गीतको छायांकन गर्न लागिएको हो । यो फिल्मलाई सुशन प्रजापतिले छायांकन गरिरहेका छन् । तिहार अगावै फिल्मको सम्पूर्ण छायांकन सकिने जानकारी प्राप्त छ ।
