एउटा घटनाका कारण एक वर्ष जेल जीवन विताएर गत फागुनमा रिहा भएका अभिनेता पल शाहलाई यतिबेला म्यूजिक भिडियो र फिल्म दुवैको अभाव छैन । रिहा भएपछि उनले दुई दर्जन बढी म्यूजिक भिडियोमा काम गरिसकेका छन् । दशैंभन्दा अघि उनले फिल्म ‘मायावी’मा काम गरे । यो फिल्मको अझै केही प्रतिशत छायांकन बाँकी नै छ । उनको पाइपलाइनमा अर्को फिल्म पनि छ ।
‘भैरे’ फेम्ड निर्देशक एभरेष्ट सूर्य बोहोराको एक फिल्ममा पल केही महिनाअघि नै अनुबन्ध भइसकेका छन् । ‘मायावी’भन्दा अगाडि नै उनले यो फिल्म सम्झौता गरेका हुन् । निर्देशक बोहोराले पनि आफ्नो नयाँ फिल्ममा पल अनुबन्धित भएको फिल्मीखबरसँग पुष्टि गरे । फिल्म ठूलो स्केलमा बन्न लागेको बताउँदै उनले यस वर्षको अन्त्यबाट छायांकन सुरु गर्ने तयारी भइरहेको जानकारी गराए ।
‘यतिबेला हामी स्क्रिप्टलाई अन्तिम रुप दिइरहेका छौं । २०२४ बाट सुटिङ सुरु गर्ने योजना छ । स्क्रिप्ट र चरित्रको बारेमा पलजीसँग पनि निरन्तर छलफल भइरहेको छ । सम्भवतः चाँडै फिल्मबारे आधिकारिक जानकारी गराउनेछौं,’ उनले भने । बोहोराले यसअघि ‘भैरे’सँगै ‘अग्नि परीक्षा’, ‘मुटु’, ‘ठूली’, ‘श्री’, ‘हेल्लो जिन्दगी’ आदि फिल्मको निर्देशन गरिसकेका छन् । यी फिल्ममा उनकै लेखन छ ।
पलले रिहा भएपछि आफ्नै लगानीमा फिल्म बनाउने गरि निर्देशकको प्रस्ताव दिनेश राउतलाई राखेका थिए । तर, विभिन्न कारणले उक्त प्रोजेक्ट धकलिएपछि उनी ‘मायावी’मा जोडिए । सम्भवतः तिहारपछि यो फिल्मको बाँकी छायांकन सुरु हुनसक्छ । यसपछि उनले निर्देशक बोहोराको फिल्मलाई समय छुट्याउनेछन् । उनले जेल जीवनभन्दा अगाडि पनि केही फिल्म सम्झौता गरेका थिए ।
