संकटको अवस्थामा रहेको नेपाली फिल्म क्षेत्रलाई वैतरणी तारेको फिल्म हो, ‘लुट’ । यो फिल्मले घरेलू बजारको आकार र आयतन मात्र बढाएन, बलिउड फर्मुलाबाट ग्रस्त रहेको नेपाली फिल्मको कथावाचन शैलीमै नयाँ ट्रेन्ड सुरु गरिदियो । हिरोको परम्परागत मानक भत्किएर अभिनयमा दख्खल कलाकारहरु स्थापित हुन थाले । एक हिसाबले ‘लुट’ले नेपाली फिल्ममा नयाँ युग सुरु गर्यो ।
२०७३ सालमा यसको दोस्रो सिक्वेल बन्यो । तर, ‘लुट’को साख नै जोगाउन सकेन । फिल्म सफल भए पनि निर्देशक निश्चल बस्नेतले फर्मुलामा जोड दिँदा सशक्त रुपमा कथा भन्न सकेनन् । त्यसो त उनले ‘लुट २’मा आफू चुकेको कुरा स्वीकार गरिसकेका छन् । यसपछि ७ वर्ष विश्राम लिएका उनले कात्तिक २४ गतेदेखि प्रदर्शन हुन लागेको फिल्म ‘दिमाग खराब’बाट पुनरागमन गरेका छन् ।
.jpg)
अब उनले ‘लुट ३’ बन्ने प्रष्ट संकेत गरेका छन् । फिल्मको कथालाई एउटा विन्दूमा पुर्याउने उनको योजना छ । तर, यसका लागि उनी हतार गर्ने पक्षमा छैनन् । समय लिएरै फिल्म बनाउने उनको सोच छ । यद्यपि, तेस्रो सिक्वेलका लागि दिमागमा केही चिज भने फुरिसकेको र अब त्यसलाई अघि बढाउने उनले बताएका छन् । पैसा कमाइन्छ भनेर चाहिँ सिक्वेल नबनाउने निश्चलको कथन छ ।
एक पोडकास्टमा उनले भनेका छन्, ‘मलाई ‘लुट ३’ बनाउनु चाहिँ छ । तर, अलि समय लिएरै गर्छु । एक-दुईटा कारण छ, जसले गर्दा मलाई सिक्वेल मात्र गरेर बस्न मन छैन । त्यो बनाएँ भने पैसा कमाइन्छ भन्ने सोचले बनाए आलु हुन्छ । पैसा मात्र कमाइन्छ भन्ने सोच भयो भने त जतिबेला बनाए पनि हुन्छ नि ।’ दिमागमा फुरेको कथा स्क्रिप्टमा आउँदा चित्त बुझे मात्र ‘लुट ३’ बन्ने उनले बताए ।
‘त्यो कथालाई यहाँ पुर्याउने मन छ भन्ने चाहिँ लागिरहेकै छ । त्यसका लागि एउटा सानो चिज २/४ दिनअघि दिमागमा फुरेको छ । हेरौं त्यसलाई कसरी अगाडि लैजान सकिन्छ । चित्त बुझ्दो चिज नै अघि बढ्छ कि यो यति नै रैछ भनेर थन्काइन्छ थाहा छैन,’ उनले भने । उनी ‘दिमाग खराब’प्रति आत्मविश्वासी पनि देखिएका छन् । अबदेखि उनी एक वर्षमा एउटा फिल्म बनाउने योजनामा छन् ।
