घनश्याम लामिछानेद्वारा निर्देशित फिल्म ‘चित्रा’को तिहारको छेको पारेर पहिलो गीत सार्वजनिक गरिएको छ । ‘नजरैको हानाहान’ बोलको लोक शैलीको गीतमा राजनराज सिवाकोटी र मिलन नेवारको स्वर रहेको छ भने सिवाकोटी स्वयंको शब्द तथा संगीत छ । प्रविण सिंहको कोरियोग्राफी रहेको गीतमा फिल्मका अभिनेता सन्तोष अधिकारी र अभिनेत्री शुभेच्छा खड्काको नृत्य समावेश छ ।
सन्तोष अधिकारी फिल्म्स तथा अस्याप इन्टरटेनमेन्ट नेपाल र अस्ट्रेलियाको सहकार्यमा निर्माण भएको यस फिल्ममा मेनुका प्रधान, प्रमोद अग्रहरी, अर्पण थापा, अन्जना बराइली, सिम्रन खड्का, आयुशी ढकाल, विनोद पौडेल, कपिल शर्मा, कुमार गुरुङ, उज्ज्वल ढकाल, दीपेश गजुरेल, प्रकाश घिमिरेलगायतको पनि अभिनय रहेको छ । फिल्मको बाबु र छोरीको कथालाई उठान गरेको छ ।
आगामी पौष २७ गतेबाट प्रदर्शनमा आउन लागेको फिल्ममा आशिष थापा मगर निर्माता र सन्तोष अधिकारी कार्यकारी निर्मातामा छन् । अजय अधिकारीको कथा, मनिष गौतमको पटकथा तथा संवाद रहेको फिल्ममा सम्राट बस्नेतको द्वन्द्व निर्देशन, बनिष शाह र सन्देश शाहको सम्पादन, महेश पौडेलको छायांकन छ । फिल्मलाई देशभर केदार पराजुलीको श्रीकृष्ण फिल्मस्ले वितरण गर्दैछ ।
