आशुतोष ध्वज कार्कीको लेखन तथा निर्देशन रहेको फिल्म ‘जम्प’को ट्रेलर सार्वजनिक गरिएको छ । लक्ष्मीपूजाको अवसर पारेर आइतबार युट्युबमा सार्वजनिक २ मिनेट १२ सेकेण्डको ट्रेलरमा राष्ट्रिय धावक रहेका एक पात्रलाई समय परिवर्तन गर्ने अलौकिक क्षमता प्राप्त भएपछि उत्पन्न परिस्थितिलाई देखाइएको छ । फिल्म आगामी मंसिर २९ गतेबाट प्रदर्शनमा आउँदैछ ।
फिल्ममा सरोज श्रेष्ठ, सन्देश शाक्य, विनिता थापा मगर, मन्जिल जिसी, सगुन तामाङ, रोशनी स्याङ्ग्बो, शंकर महर्जन, प्रवल कंडेल आदिको मुख्य भूमिका रहेको छ । कथा प्रोजेक्ट्स इन्डिपेन्डेन्ट स्टुडियो र क्रियटिभ माकुरा मिडिया प्रोडक्सनको सहकार्यमा निर्माण भएको फिल्मको कार्यकारी निर्मातामा इशा खड्का छिन् ।
विदेशका विभिन्न फेस्टिभलमा पुगेको यो फिल्म दर्शकलाई पृथक लाग्ने निर्देशक कार्कीले बताए । फिल्म साइकोलोजिक थ्रिलर जनरामा बनेको छ । कार्यकारी निर्माता खड्काले कथावाचन शैली र प्रस्तुतिमा ‘जम्प’ले नेपाली फिल्म क्षेत्रमा नयाँ मानक स्थापित गर्ने विश्वास व्यक्त गरेकी छन् । फिल्मलाई गोविन्द शाहीले वितरणको जिम्मा लिएका छन् ।
