ट्राफिक नियम र प्रहरीको कथामा आधारित भएर निर्माण भएको यज्ञजंग विके (आयुष बिसी) निर्देशित फिल्म ‘रेड अन’को टिजर सार्वजनिक गरिएको छ । शुक्रबार युट्युबमार्फत् सार्वजनिक १ मिनेट ४३ सेकेण्ड लम्बाईको टिजरमा इमानदार र निडर प्रहरीको कथालाई प्रस्तुत गरिएको छ । फिल्मले ट्राफिक नियमलाई पालन गर्नुपर्ने सन्देश दिने निर्देशक यज्ञजंगले जानकारी दिएका छन् ।
यस फिल्ममा किशोर खतिवडा, दीपक थापा, सिर्जना कार्की, खगेन्द्र नेपाल, खगेन्द्र सुवेदी, वर्षा श्रेष्ठ, वीरेन्द यादव, विक्रम घिमिरे, कमल ज्ञवाली, आशिष ओली, हेमराज घर्ती आदिको अभिनय छ । खगेन्द्र सुवेदीको कथा र सिड गौतमको पटकथा लेखन रहेको फिल्ममा विकास चौधरीको संगीत, सम्राट थापाको पार्श्व संगीत, राज गौतमको सहायक निर्देशन, सुजन विश्वकर्माको छायांकन छ ।
खगेन्द्र सुवेदी निर्माता रहेको फिल्मको सह-निर्मातामा आभाष गिरी र रमेश बंगोसाई छन् । सवारी चालक अनुमति पत्र (लाइसेन्स) बिना सवारी चलाएर दुर्घटना हुँदा कतिसम्म हैरानी भोग्नुपर्छ भन्ने कुरालाई फिल्ममा समावेश गरिएको निर्देशक विकेले स्पष्ट पारेका छन् । प्रहरीका लागि ‘रेड अन’ एउटा दस्तावेज हुने उनको विश्वास छ । फिल्मको प्रदर्शन मिति चाँडै घोषणा गरिने जनाइएको छ ।
