यम शेर्पाको डेब्यू निर्देशनमा तयार हुन लागेको फिल्म ‘कार्साङ’मा अभिनेत्री शिल्पा मास्के मुख्य भूमिकामा अनुबन्धित भएकी छन् । उनीसँग निर्माण टिमले यसै साता सम्झौता गरेको हो । गत असारमा उनी अभिनीत फिल्म ‘परस्त्री’ प्रदर्शनमा आएको थियो भने तिहारअघि फिल्म ‘रङ्गेली’को एक गीतमा नृत्य गरेकी थिइन् । प्रायः हरेक फिल्ममा उनको अभिनयको प्रशंसा हुँदै आइरहेको छ ।

फिल्ममा यसअघि दयाहाङ राई, सुरक्षा पन्त, बुद्धि तामाङ र नव–कलाकार छिरिङ शेर्पा पनि फाइनल भैसकेका छन् । शिल्पाको प्रवेशसँगै फिल्ममा अब तीनजना नायिका हुने भएका छन् । पुरुषोत्तम प्रधानको छायांकन रहने फिल्मको मंसिरको दोस्रो हप्ताबाट सिन्धुपाल्चोकको बाह्रबिसे नगरपालिका र भोटेकोसी गाउँपालिका विभिन्न स्थानमा छायाकंन हुने निर्देशक शेर्पाले जानकारी दिए ।

फिल्ममा निर्देशक शेर्पा स्वयंको कथा, पटकथा तथा संवाद लेखन छ । ‘कार्साङ’ शेर्पा जातिको सामाजिक कथावस्तुमा निर्माण हुने जनाइएको छ । यार्सा फिल्मस्को व्यानरमा निर्माण हुन लागेको फिल्मको ओभरसिज राइट्स छायाकंन अगावै बिक्री भैसकेको छ । फिल्मलाई अन्तर्राष्ट्रिय बजारमा सेभेन सिज इन्टरटेनमेन्टले रिलिज गर्दैछ भने नेपालमा वितरण अधिकार आरआर फिल्मससँग छ ।