६ वर्षदेखि एउटा ‘क्लिन हिट’ फिल्मको पखाईमा थिए, सुपरस्टार सलमान खान । उनलाई ठूलो आशा फिल्म ‘टाइगर ३’लाई लिएर थियो । सुपरहिट फिल्मको श्रृंखला भएकाले सफलताको सम्भावना उच्च थियो । तर, क्रिकेट वर्ल्डकपको प्रभाव र फिल्म आफैंमा कमजोर हुँदा फ्लपको खतरा बढेको छ । ३ सय करोडको लागतमा बनेको फिल्मलाई लगानी उठाउन पनि कठिन भइरहेको छ ।
फिल्मको कमाई तीन दिन दमदार रह्यो । लक्ष्मीपूजाको बावजूद पहिलो दिन फिल्मले ४३ करोडको बम्पर ओपनिङ गरेको थियो । दोस्रो दिन ५८ करोड र तेस्रो दिन ४३ करोड ५० लाख कमायो । यसपछि फिल्मले एक दिनमा २० करोडमाथि जोड्न सकेको छैन । पहिलो हप्ता फिल्मले २ सय १४ करोड २५ लाख छापेको थियो । दोस्रो हप्तामा फिल्मको व्यापार निकै कमजोर बनिरहेको छ ।
सोमबार फिल्मले ६ करोड मात्रै कमाएको इन्डिया एक्सप्रेसले उल्लेख गरेको छ । प्रदर्शनको ९ दिनमा फिल्मको कमाई २ सय २६ करोड पुगेको छ । फिल्मको कमजोर बन्दै गएको व्यापारले ३ सय करोडको आँकडा सम्भव देखिँदैन । फिल्मले बक्स अफिसबाट लगानी उठाउन ४ सय करोडको आँकडा नघाउनु पर्ने हुन्छ, जुन अब असम्भवझैँ छ । यो हुँदा फिल्मलाई फ्लपको ट्याग लाग्नेछ ।
प्रदर्शनपूर्व फिल्मको हाइप हेर्दा ५ सय करोड प्रक्षेपण गरिएको थियो । तर, ‘वर्ड अफ माउथ’ नै अब्बल नहुँदा फिल्मको व्यापारमा निरन्तर गिरावट आउन थाल्यो । र, भारतमा भएको क्रिकेट वर्ल्डकपले पनि फिल्मको व्यापार राम्रै विथोल्यो । ‘टाइगर ३’ हलको व्यापारले फ्लपको खतरा भए पनि निर्माण कम्पनी यशराजले प्रदर्शनभन्दा अगाडि नै विभिन्न राइट्सबाट लगानी उठाइसकेको छ ।
