गण्डकी प्रदेशका सांसद् तथा पूर्व खेलकुदमन्त्री राजीव गुरुङ (दीपक मनाङ्गे)ले फिल्म ‘कंगारु’ निर्माण गर्ने भएका छन् । सस्पेन्स, थ्रिलर र कमेडी जनरामा बन्न लागेको फिल्मको निर्देशन भने सम्राट बस्नेतले गर्नेछन् । द्वन्द्व निर्देशनमा स्थापित उनले यस अगाडि ‘पासवर्ड’ र ‘लाखे’ गरि दुई फिल्मको निर्देशन गरिसकेका छन् । फिल्मको स्क्रिप्ट लेखनमा मात्रै २ वर्ष लागेको उनको भनाई छ ।
फूलमुन मोसन पिक्चर्स र उत्तरगया म्युजिक एण्ड फिल्मस्ले आस्याप इन्टरटेन्मेन्टसँग सहकार्य गरेर निर्माण गर्न लागेको फिल्मको निर्मातामा प्रेम थापा र धन बहादुर गुरुङ छन् । टिका भण्डारी र सन्तोष अधिकारी (अष्ट्रेलिया) कार्यकारी निर्माता रहेको फिल्मको सह-निर्मातमा रोनिश बहादुर बस्नेत र निशान श्रेष्ठ छन् । फिल्मको लाइन प्रोड्यूसरमा आस्याप इन्टरटेन्मेन्ट (अष्ट्रेलिया) रहेको छ ।
लक्ष्मी ज्वेलर्स (यूके)ले पनि निर्माणमा सहकार्य गरेको फिल्ममा सिमा गुरुङको कथा लेखन र महेश दवाडीको पटकथा लेखन छ । आगामी फागुनदेखि छायांकन सुरु हुने फिल्मका लागि कलाकार भने निश्चित भैसकेका छैनन् । केही कलाकारसँग भने छलफल चलिरहेको निर्देशक बस्नेतले बताए । यसपटक दर्शकले केही फरक स्वाद पाउने र फिल्मको कथा पृथक रहेको उनको दाबी छ ।
