‘कबीर सिंह’ जस्तो सुपरहिट फिल्म दिएका निर्देशक सन्दीप रेड्डी भांगा लिखित तथा निर्देशित फिल्म ‘एनिमल’को ट्रेलर सार्वजनिक गरिएको छ । ३ मिनेट ३२ सेकेण्ड लम्बाईको ट्रेलर ‘पावर प्याक्ड’ छ । अभिनेता रणवीर कपूरलाई प्राथमिकता दिइएको ट्रेलरमा बाबु-छोराको दुश्मनी र बुबाका लागि छोराले गर्ने लडाईंलाई चित्रित गरिएको छ । ट्रेलरमा रणवीर ‘एङ्ग्री’ अवतारमा प्रस्तुत छन् ।
बाल्यकालमा पिताले समय नदिँदा छोरा हिंसात्मक क्रियाकलापमा संलग्न भएको कथामा फिल्म आधारित रहेको ट्रेलरले बुझाउँछ । अभिनेता अनिल कपूरले रणवीरको पिताको भूमिका निभाएका छन् । फरक किसिमको एक्सन प्रयोग गरिएको ट्रेलरमा ध्यान खिच्ने पक्ष भनेको अभिनेता बबी देओलको लुक्स हो । ट्रेलरको अन्तिम सिनमा उनी ‘सर्टलेस’ अवतारमा रणवीरसँग भिड्दै प्रस्तुत छन् ।
‘एनिमल’मा रणवीरकी श्रीमतीको भूमिकामा अभिनेत्री रश्मिका मन्दाना देखिएकी छन् । तृप्ति डिमरी, प्रेम चोपडा, शक्ति कपूरको पनि फिल्ममा मुख्य भूमिका रहेको छ । डिसेम्बर १ मा रिलिज हुन लागेको फिल्मले बक्सअफिसमा आक्रामक व्यापार गर्ने प्रक्षेपण गरिएको छ । हिन्दीका साथै तमिल, तेलुगु, मलयालम र कन्नड भाषामा एकसाथ फिल्मलाई रिलिज गर्ने निर्माण टिमको तयारी छ ।
