‘प्रकाश’ फेम्ड निर्देशक दिनेश राउतले आफ्नो सातौं फिल्मको घोषणा गरेका छन् । उनले बिहीबार फेसबुकमार्फत् ‘पुजार सार्की’ शीर्षकमा फिल्म निर्माणको घोषणा गरेका हुन् । वास्तविक कथा र पात्रबाट प्रभावित भएर निर्माण हुन लागेको फिल्मको छायांकन आगामी माघ महिनाको पहिलो साताबाट सुरु हुने जानकारी गराइएको छ । फिल्मको सम्पूर्ण छायांकन पश्चिम नेपालमा गरिनेछ ।
संगीतकार समेत रहेका सुभाष भुषालको निर्माण रहने फिल्मका लेखक विकास सुवेदी हुन् । निर्देशक राउत र लेखक सुवेदीबीच यसअघि ‘प्रकाश’मा सहकार्य भएको थियो । किङ्गडम नेटवर्कको प्रस्तुति रहने फिल्मको देशभर वितरण आरआर फिल्म्सले गर्नेछ । फिल्मका लागि मुख्य भूमिकामा एकजना अभिनेता अनुबन्धित भैसकेका छन् । तर, निर्माण टिमले नाम सार्वजनिक गरेको छैन ।
‘प्रकाश’पछि निर्देशक राउत गायक स्वप्न सुमन र गायिका दिक्षिता कार्कीलाई लिएर एक लभस्टोरी फिल्म बनाउने तयारीमा थिए । तर, विभिन्न कारणले यो फिल्मको निर्माण धकेलिएको छ । उनको पाइपलाइनमा अभिनेताद्वय प्रदीप खड्का र आर्यन सिग्देलको एक फिल्मसँगै अभिनेता पल शाहको फिल्म पनि छ । ‘पुजार सार्की’पछि उनले यी तीन फिल्ममध्ये एकको छायांकन सुरु गर्नेछन् ।
