विश्वमै सर्ट फिल्म कथावाचनको एउटा सशक्त माध्यम बनिरहेको छ । र, मेकरहरुको प्रयोगशाला । ठूला फिल्म उद्योगका स्थापित निर्देशकहरुले सुरुवातमा सर्ट फिल्ममा आफूलाई प्रयोग गरेको पाइन्छ । अमेरिकामा रहँदै आएका नेपालका नीरञ्जन पाण्डेले पनि सर्ट फिल्म ‘उडान’मार्फत् आफूलाई फिल्म मेकिङमा प्रयोग गरेका छन् । आइतबार यो फिल्मको टिजर सार्वजनिक गरिएको छ ।
प्रेम, रोमान्स र द्वन्द्वलाई चित्रित गरिएको टिजरमा ब्याकग्राउन्ड म्यूजिक सशक्त छ । टिजरले ‘उडान’प्रति दर्शकहरुमा कौतुहलता जगाउन सक्छ । निर्देशक पाण्डे स्वयंको सम्पादन रहेको फिल्ममा अर्जुन देब्सन, विना श्रेष्ठ, गोर्विएल डेवान, रोनिन मोलास्ची, जोन हेर्जलर, यूवराज थापा, ओमार कासाराज, राजु गिलानीको अभिनय छ । यो फिल्म क्रिसमसको समयमा युट्युबमा रिलिज हुनेछ ।
फिल्ममा प्रविशा अधिकारी र सनुप पौडेलको स्वरबद्ध ५ मिनेटको गीत समेत राखिएको छ । फिल्ममा त्रिकोणात्मक प्रेमकथालाई उतारिएको निर्देशक पाण्डेले जानकारी दिए । फिल्मले अमेरिकामा रहँदै आएका नेपाली युवा-युवती र एक अमेरिकन युवाको प्रेम कथालाई प्रस्तुत गरेको छ । बलराम बुढाथोकीको छायांकन रहेको यो फिल्मलाई मुभिज इन्फिनिटी क्रियशनले निर्माण गरेको हो ।
