सत्यराज आचार्यको परिचय गायकको रुपमा मात्र सीमित छैन । उनी गीतकार हुन्, संगीतकार हुन् र फिल्मको हिरो पनि । उनले मुख्य भूमिकामा ‘आचार्य’, ‘साढे ७’ र ‘हैरान’ गरी तीनटा फिल्ममा अभिनय गरिसकेका छन् । ‘साढे ७’को त उनी निर्माता पनि हुन् । तर, गायनमा जति सफलता उनलाई अभिनय र निर्माणमा मिल्न सकेको छैन । अब उनी फिल्मको निर्देशक बन्ने तयारीमा छन् ।
सत्यराजले निर्देशन गर्न लागेको फिल्मको नाम ‘टेण्डर’ हो । उनले कात्तिक दोस्रो साता चलचित्र विकास बोर्डबाट फिल्म निर्माणको इजाजत लिएका थिए । कलाकारमा पनि उनकै नाम चढाइएको छ । सत्य स्वरुप इन्टरटेन्मेन्टको ब्यानरमा बन्न लागेको फिल्मलाई सत्यराजले भाई स्वरुपराज आचार्य (गायक)सँग मिलेर निर्माण गर्दैछन् । फिल्मको निर्माण लागत १ करोड अनुमान गरिएको छ ।
सत्यराजले भने प्रतिलिपी अधिकार (कपीराइट ) सुरक्षितका लागि निर्देशकमा आफ्नो नाम राखेर फिल्म दर्ता गरेको बताएका छन् । उनले फिल्मीखबरसँगको कुराकानीमा भने, ‘मैले नै फिल्म निर्देशन गर्ने निश्चित चाहिँ भैसकेको छैन । अहिले म छलफलमै छु । तर, सोच चाहिँ निर्देशन गर्ने नै छ । केही दिनमा यस विषयमा टंगो लाग्छ ।’ उनले फिल्मबारे अरु जानकारी भने गराउन चाहेनन् ।
