यही मंसिर २९ गतेबाट प्रदर्शनमा आउने तयारीमा रहेको आशुतोषध्वज कार्कीद्वारा निर्देशित फिल्म ‘जम्प’को नयाँ गीत सार्वजनिक गरिएको छ । ‘फेरि फर्किन्छ’ बोलको गीतमा विशाखा चन्द र भाष्कर स्वरको स्वर रहेको छ भने गायक स्वर स्वयंको शब्द रचना तथा संगीत छ । गीतमा फिल्मका प्रमुख पात्रको मनोदशालाई उतारिएको छ । गीतले नै फिल्म फरक शैलीमा बनेको संकेत गर्छ ।
यो फिल्ममा सरोज श्रेष्ठ, बिनिता थापा मगर, सन्देश शाक्य, सगुन तामाङ, मन्जिल जिसी, शंकर महर्जन, एन्जेलिका खत्री, अरोष्मा रन्जित, प्रज्वल खँडेल, सुदिप भुषाल, इलिस विष्ट, रितेश राजकर्णिकार लगायतको अभिनय रहेको छ । एक एथ्लेटिक्स खेलाडीले आफ्नो जीवन परिवर्तनका लागि दैवी शक्तिको साहरा लिएपछि आउने घटनाक्रमको कथावस्तुमा केन्द्रित भएर फिल्म बनेको छ ।
जीवनमा आइपर्ने बाध्यता र त्यसलाई पन्छाउनका लागि चालेको एउटा अनौठो कदमपछिको अवस्था र तनावलाई फिल्मले प्रस्तुत गर्ने निर्देशक कार्की बताउँछन् । फरक स्वाद रुचाउने दर्शकका लागि फिल्म रुचिकर हुने उनको विश्वास छ । फिल्ममा निर्देशक कार्कीको कथा छ । इशा खड्का कार्यकारी निर्माता रहेको फिल्मलाई काफिया फिल्म्सले देशभर वितरणको जिम्मा लिएको छ ।
